Read nynorsk 2011 Habakkuk 1 Bible Online

Habakkuk 1 - nynorsk 2011 bible

Habakkuk 1

¹Bodskapen som profeten Habakkuk fekk sjå.

² Kor lenge, HERRE, skal eg ropa utan at du høyrer, skrika til deg om vald utan at du frelser?

³ Kvifor lèt du meg sjå urett? Korleis kan du sjå på ulukke? Herjing og vald like ved meg, det blir strid, det kjem til trette.

⁴ Difor er lova kraftlaus, og retten når aldri ut. For den urettferdige kringset den rettferdige, difor blir retten vrangsnudd.

⁵ Sjå på folkeslaga, sjå dykk om, forvirr dykk sjølve og ver forvirra! For i dykkar dagar gjer eg ei gjerning, de ville ikkje tru det om det vart fortalt!

⁶ Sjå, eg reiser opp kaldearane, det brutale og raske folkeslaget som fer så vidt omkring på jorda og tek bustader som ikkje høyrer dei til.

⁷Skremmande og fryktelege er dei, deira rett og heider kjem frå dei sjølve.

⁸Raskare enn leopardar er hestane deira, villare enn ulvar i øydemarka. Ryttarane deira jagar av stad, ryttarane kjem frå det fjerne, dei flyg som ørna på jakt etter føde.

⁹Alle kjem dei og vil gjera valdsverk, dei rykkjer fram i flokk, dei samlar fangar som sand.

¹⁰Dei gjer narr av kongar og gjer fyrstar til lått. Dei ler av kvar festning, kastar opp ein jordvoll og tek henne.

¹¹Så fer dei vidare og blir borte som vinden. Dei fører skuld over seg. Deira styrke er deira gud.

¹² [1] Er ikkje du frå gammal tid, HERRE, min heilage Gud, du som aldri døyr! HERRE, du har sett dei til å dømma, vårt berg, du har gjeve dei fullmakt til å straffa.

¹³ Auga er for reine til å sjå det vonde, ulukke orkar du ikkje å sjå på. Så korleis kan du sjå på dei trulause og teia når den urettferdige sluker den som er meir rettferdig enn han sjølv?

¹⁴ Du gjer mennesket lik fisken i havet, lik kryp utan herskar.

¹⁵Dei dreg dei alle opp med krok, halar dei inn med not og samlar dei i garnet. Difor gleder dei seg og jublar.

¹⁶ [2] Difor ofrar dei til nota og tenner offereld for garnet. For frå dei får dei rik fangst og feit mat.

¹⁷ [3] Skal dei då alltid få tømma nota og utan medkjensle gjera ende på folkeslag?