Read nynorsk 2011 Habakkuk 3 Bible Online

Habakkuk 3 - nynorsk 2011 bible

Habakkuk 3

¹[6] Ei bøn av profeten Habakkuk. Som ein sjiggajon.

² HERRE, eg høyrde gjetord om deg, eg såg, HERRE, det du har gjort. Ta det opp att i vår tid, gjer det kjent i vår tid! Hugs å visa miskunn sjølv om du er vreid!

³ [7] Gud kjem frå Teman, Den heilage frå Paran-fjellet. Sela Hans herlegdom dekkjer himmelen, og lovsong til han fyller jorda.

⁴Lysglansen er som ein soloppgang, strålar går ut frå hans hand. Der er styrken hans løynd.

⁵ Føre han går pest, i hans fotefar følgjer sott.

⁶Han stansar og rister jorda, han ser og får folkeslag til å skjelva. Gamle fjell blir knuste, eldgamle haugar sig i hop. Han går på gamle vegar.

⁷ [8] Eg ser Kusjans telt ramma av ulukke, og teltdukane i Midjan skjelv.

⁸ Er du harm på elvane, HERRE? Logar din vreide mot elvane? Er det havet du er harm på når du rid fram på hestane dine og vognene dine gjev siger?

⁹Du gjer bogen klar og legg pil etter pil på strengen. Sela Du kløyver jorda så elvar renn.

¹⁰ Fjella ser deg og skjelv, styrtregnet fossar ned, djupet lyfter røysta og lyfter handa mot det høge.

¹¹Sol og måne står stille i sin bustad når lyset frå pilene fer hit og dit, lysglansen frå ditt lynande spyd.

¹²I harme skrid du fram over jorda, i vreide trampar du folkeslag ned.

¹³ [9] Du dreg ut for å frelsa ditt folk, for å frelsa han du har salva. Du knuser overhovudet for huset til den urettferdige, kler av frå topp til tå. Sela

¹⁴Med hans eigne piler gjennomborar du hovudet på krigarane hans. Dei stormar fram, vil driva meg bort, dei frydar seg som om dei skulle eta ein hjelpelaus som er i løynd.

¹⁵Med hestane dine fer du over havet, dei veldige, brusande vatna.

¹⁶Eg høyrde det, då skalv mitt indre, og leppene dirra ved lyden. Det kom verk i beina mine, føtene vakla under meg. Roleg ventar eg på at trengselsdagen skal koma over det folket som går til åtak på oss.

¹⁷For fikentreet blømer ikkje, vinstokken ber ikkje frukt, olivenhausten slår feil, åkeren gjev ikkje mat, sauene er borte frå kvea, fjøset er tomt for fe.

¹⁸ Men eg vil fryda meg i HERREN, jubla i Gud, min frelsar.

¹⁹ GUD Herren er min styrke. Han gjev meg føter som ei hind og lèt meg ferdast på høgdene. Til korleiaren. Med strengespel.