Read nynorsk 2011 Sefanja 2 Bible Online

Sefanja 2 - nynorsk 2011 bible

Sefanja 2

¹Samla dykk! Kom saman, du folk utan skam,

² før det som er fastsett, blir sett i verk og dagen fyk bort som agner, før HERRENS brennande vreide kjem over dykk, før HERRENS vreidedag kjem over dykk!

³ Søk HERREN, alle de audmjuke i landet, de som følgjer hans bod! Søk rettferd, ver audmjuke, så finn de kanskje ly på HERRENS vreidedag.

⁴Gaza skal liggja folketomt og Asjkalon bli ei øydemark. Asjdod skal drivast bort midt på lyse dagen og Ekron rykkjast opp.

⁵Ve dykk kretarar som bur ved kysten! Dette er HERRENS ord mot dykk: «Kanaan, du filistarland, eg legg deg i øyde så ingen kan bu der.

⁶Kysten skal bli til beitemark med brønnar for gjetarane og kveer for småfeet.»

⁷ Dei som er att av Judas hus, skal ha kysten som beiteland. Om kvelden skal dei leggja seg til kvile i husa i Asjkalon. For HERREN deira Gud skal sjå til dei, han skal venda deira lagnad.

⁸Eg høyrde spott frå Moab og hån frå ammonittane då dei spotta folket mitt og briska seg mot landet.

⁹ Difor seier HERREN over hærskarane, Israels Gud: Så sant eg lever, skal det gå Moab som Sodoma og ammonittane som Gomorra; dei skal bli ei tistelmark, ei saltgruve, ei øydemark for alltid. Dei som er att av folket mitt, skal plyndra dei, ein rest av folket skal ta dei i eige.

¹⁰Dette får dei att for sitt overmot, fordi dei spotta og såg ned på folket til HERREN over hærskarane.

¹¹ HERREN vekkjer frykt hos dei når han utryddar alle gudane på jorda. Alle folkeslag frå fjerne kystar skal koma og tilbe han, kvar frå sin stad.

¹²De òg, kusjittar, skal gjennomborast av mitt sverd.

¹³Han lyfter handa mot nord og øydelegg Assur. Han gjer Ninive til øydemark, tørr som ein ørken.

¹⁴ Midt i henne skal buskapar kvila og alle slag ville dyr. Pelikan og hegre skal sova på søylehovuda og ugla tuta frå vindauga, på dørstokken skal ramnen sitja. Sederpanelet blir rive av.

¹⁵ Dette er den jublande byen, ho som låg så trygt og sa i sitt hjarte: «Eg — og ingen annan!» Kor aud ho har vorte, ein kvileplass for villdyr! Alle som dreg forbi, plystrar hånleg til henne og slår ut med hendene.