Read nynorsk 2011 Haggai 1 Bible Online

Haggai 1 - nynorsk 2011 bible

Haggai 1

¹[1] I det andre regjeringsåret til kong Dareios, på den første dagen i den sjette månaden, kom HERRENS ord gjennom profeten Haggai til statthaldaren i Juda, Serubabel, son til Sjealtiel, og til øvstepresten Josva, son til Jehosadak:

²Så seier HERREN over hærskarane: Dette folket seier: «Tida er ikkje komen, tida for å byggja HERRENS hus.»

³Då kom HERRENS ord ved profeten Haggai:

⁴ Er det tid for dykk til å bu i bordkledde hus så lenge dette huset ligg i røys?

⁵Men no seier HERREN over hærskarane: Gjev akt på vegane dykkar!

⁶ De sår mykje, men haustar lite, de et, men blir ikkje mette, de drikk, men sløkkjer ikkje tørsten, de kler dykk, men blir ikkje varme. Og leigekaren får si løn i ein pung med hol i.

⁷Så seier HERREN over hærskarane: Gjev akt på vegane dykkar!

⁸Far opp i fjellet og hent tømmer! Bygg huset, så vil eg ha glede i det og bli æra, seier HERREN.

⁹De ventar mykje, men sjå, det blir lite. De får avlinga i hus, men eg blæs henne bort. Kvifor? seier HERREN over hærskarane. Fordi mitt hus ligg i røys medan de har det travelt med dykkar eigne hus.

¹⁰ Difor held himmelen dogga tilbake, og jorda held grøda tilbake.

¹¹ Eg har kalla fram tørke over land og fjell, over korn, ny vin og fin olje, over det som marka ber fram, over menneske og dyr og over alt det hendene har slite med.

¹²Serubabel, son til Sjealtiel, og Josva, son til Jehosadak, øvstepresten, og alle som var att av folket, høyrde på røysta til HERREN sin Gud og på orda til profeten Haggai, for HERREN deira Gud hadde sendt han. Og folket frykta HERREN.

¹³Haggai, HERRENS sendebod, bar fram HERRENS bodskap til folket: «Eg er med dykk, seier HERREN.»

¹⁴ HERREN vekte ein tanke hos Serubabel, son til Sjealtiel, statthaldaren i Juda, og hos Josva, son til Jehosadak, øvstepresten, og hos alle som var att av folket. Og dei kom og arbeidde på huset til sin Gud, HERREN over hærskarane,

¹⁵[2] på den tjuefjerde dagen i den sjette månaden i det andre regjeringsåret til kong Dareios.