Read nynorsk 2011 Haggai 2 Bible Online

Haggai 2 - nynorsk 2011 bible

Haggai 2

¹[3] På den tjueførste dagen i den sjuande månaden kom HERRENS ord gjennom profeten Haggai:

²Sei til Serubabel, son til Sjealtiel, statthaldaren i Juda, og til Josva, son til Jehosadak, øvstepresten, og til dei som er att av folket:

³Er det nokon att mellom dykk som har sett kor herleg dette huset var før? Og kva ser de no? Ser det ikkje ut som ingenting?

⁴ Men no, Serubabel: Ver sterk! seier HERREN. Josva, son til Jehosadak, du øvsteprest: Ver sterk! Heile folket i landet: Ver sterke! seier HERREN. Gå i gang med arbeidet. For eg er med dykk, seier HERREN over hærskarane.

⁵ Denne lovnaden gav eg dykk då de drog ut frå Egypt. Min Ande er mellom dykk. Ver ikkje redde!

⁶ For så seier HERREN over hærskarane: Endå ein gong, om ei lita stund, rister eg himmel og jord, havet og det tørre landet.

⁷ Eg rister alle folkeslag så skattane deira kjem hit. Eg fyller dette huset med herlegdom, seier HERREN over hærskarane.

⁸Mitt er sølvet, mitt er gullet, seier HERREN over hærskarane.

⁹Dette nye huset skal bli herlegare enn det første, seier HERREN over hærskarane. På denne staden skal eg gje fred, seier HERREN over hærskarane.

¹⁰På den tjuefjerde dagen i den niande månaden i det andre regjeringsåret til Dareios kom HERRENS ord til profeten Haggai:

¹¹Så seier HERREN over hærskarane: Spør prestane om rettleiing:

¹²«Om nokon ber heilagt kjøt i kappefliken og fliken kjem borti brød eller kokt mat eller vin eller olje eller annan mat, blir då dette heilagt?» Prestane svara: «Nei.»

¹³Så spurde Haggai: «Men om nokon har vorte urein gjennom å røra ved eit lik og han så kjem borti noko av dette, blir det då ureint?» Prestane svara: «Ja, det blir ureint.»

¹⁴Haggai tok til ords og sa: Slik er dette folket, slik er dette folkeslaget for mitt andlet, seier HERREN. Slik er alt dei gjer med hendene, og det dei ber fram der: Det er ureint.

¹⁵Men no, gjev akt på det som hender frå og med i dag! Før stein vart lagd på stein i HERRENS tempel,

¹⁶korleis gjekk det dykk då? Ein som kom til ein kornbinge på tjue mål, fann berre ti. Ein som kom for å ausa opp femti spann frå ei vinpresse, fann berre tjue.

¹⁷[4] Eg slo dykk med kornsot og svartrust og med hagl over alt de gjer med hendene. Men de kom ikkje til meg, seier HERREN.

¹⁸Gjev akt på det som hender frå og med i dag, frå den tjuefjerde dagen i den niande månaden, frå den dagen då grunnsteinen til HERRENS tempel vart lagd. Gjev akt på dette!

¹⁹Ligg såkornet framleis i kornkummen? Står vinstokken og fikentreet, granatapalen og oliventreet framleis utan frukt? Frå og med i dag vil eg velsigna.

²⁰ HERRENS ord kom for andre gong til Haggai på den tjuefjerde dagen i månaden:

²¹Sei til Serubabel, statthaldaren i Juda: Eg rister himmel og jord.

²²Eg støyter ned kongsstolar og gjer ende på mektige rike mellom folkeslaga. Eg velter stridsvogn og mannskap. Hestar og ryttarar skal stupa, den eine fell for sverdet til den andre.

²³[5] Den dagen, seier HERREN over hærskarane, tek eg deg, min tenar Serubabel, son til Sjealtiel — seier HERREN — og gjer deg til ein signetring. For deg har eg valt ut, seier HERREN over hærskarane.