Read nynorsk 2011 Sakarja 1 Bible Online

Sakarja 1 - nynorsk 2011 bible

Sakarja 1

¹[1] I den åttande månaden i det andre styringsåret til Dareios kom HERRENS ord til profeten Sakarja, son til Berekja, son til Iddo:

² HERREN var harm på fedrane dykkar.

³Du skal seia til folket: Så seier HERREN over hærskarane: Vend attende til meg, seier HERREN over hærskarane, så vil eg venda attende til dykk, seier HERREN over hærskarane.

⁴Ver ikkje lik fedrane dykkar. Dei tidlegare profetane ropa ut for dei: «Så seier HERREN over hærskarane: Vend no om frå dei vonde vegane og dei vonde gjerningane dykkar!» Men dei høyrde ikkje og lytta ikkje til meg, seier HERREN.

⁵Fedrane dykkar, kvar er dei? Og profetane, lever dei evig?

⁶Dei boda og forskriftene som eg påla tenarane mine, profetane, har ikkje dei nådd fedrane dykkar? Så vende dei om og sa: «HERREN over hærskarane har gjort det han hadde sett seg føre å gjera med oss, slik vår ferd og våre gjerningar har fortent.»

⁷[2] På den tjuefjerde dagen i den ellevte månaden, det er månaden sjebat, i det andre året til Dareios kom HERRENS ord til profeten Sakarja, son til Berekja, son til Iddo:

⁸I natt såg eg, og sjå! — ein mann sat på ein raud hest som stod mellom myrtebuskane i kløfta. Bak han var det raude, raudbrune og kvite hestar.

⁹Då sa eg: «Kva med desse, herre?» Engelen som tala med meg, svara: «Eg skal visa deg kva dette er.»

¹⁰Mannen som stod mellom myrtane, tok til ords og sa: «Dette er dei HERREN har sendt så dei skal fara omkring på jorda.»

¹¹Dei svara HERRENS engel som stod mellom myrtane: «Vi har fare omkring på jorda, og sjå, heile jorda ligg i ro.»

¹²[3]HERRENS engel svara: «HERRE over hærskarane, kor lenge vil det vara før du viser miskunn mot Jerusalem og byane i Juda, som du har vore harm på i desse sytti åra?»

¹³Og HERREN svara engelen som tala med meg, med gode og trøystande ord.

¹⁴Så sa engelen som tala med meg: Rop ut: Så seier HERREN over hærskarane: Eg er full av lidenskap for Jerusalem og Sion,

¹⁵ stor er harmen min mot dei sjølvgode folkeslaga. For eg var berre litt harm, men dei hjelpte ulukka fram.

¹⁶ [4] Difor seier HERREN: Eg vender attende til Jerusalem med miskunn. Der skal huset mitt byggjast, seier HERREN over hærskarane, og målesnor strekkjast ut over Jerusalem.

¹⁷Rop ut endå ein gong: Så seier HERREN over hærskarane: Endå ein gong skal byane mine fløyma over av det som godt er. Endå ein gong skal HERREN trøysta Sion, velja ut Jerusalem endå ein gong.