Read nynorsk 2011 Sakarja 14 Bible Online

Sakarja 14 - nynorsk 2011 bible

Sakarja 14

¹Sjå, det kjem ein HERRENS dag. Då skal dei dela krigsbyttet dei røva hos deg.

²Eg vil samla alle folkeslaga til krig mot Jerusalem. Byen skal bli teken, husa plyndra og kvinnene valdtekne. Halve byen må gå i eksil, men resten av folket skal ikkje ryddast ut frå byen.

³HERREN skal fara ut og føra krig mot desse folkeslaga slik han før har ført krig på stridens dag.

⁴Den dagen skal han stå med føtene på Oljeberget som ligg rett mot Jerusalem, i aust. Oljeberget skal rivna i to frå aust til vest, og det skal bli ein veldig dal. Den eine halvparten av fjellet vik mot nord og den andre mot sør.

⁵[37] Då skal de rømma gjennom fjelldalen min, for dalen mellom fjella skal nå heilt til Asal. De skal rømma slik de rømde for jordskjelvet i dei dagane då Ussia var konge i Juda. Då skal HERREN min Gud koma, og alle dei heilage med han.

⁶[38] Den dagen skal det ikkje vera lys, berre kulde og frost.

⁷Det skal vera éin lang dag — HERREN kjenner han — ikkje dag og natt, ved kveldstid skal det vera lyst.

⁸Den dagen skal det renna levande vatn ut frå Jerusalem, halvparten til havet i aust, halvparten til havet i vest. Slik skal det vera både sommar og vinter.

⁹Då skal HERREN vera konge over heile jorda. Den dagen skal HERREN vera éin og namnet hans eitt.

¹⁰[39] Heile landet skal bli som Araba-sletta, frå Geba til Rimmon, sør for Jerusalem. Men byen skal liggja høgt på sin stad, frå Benjamin-porten til den staden der Gamleporten var, til Hjørneporten, frå Hananel-tårnet til kongens vinpresser.

¹¹Der skal det bu folk. Byen skal ikkje vera bannlyst meir. Jerusalem skal liggja trygt.

¹²Dette er den plaga HERREN lèt råka alle dei folka om dei går til krig mot Jerusalem: Han skal la kjøtet rotna på dei medan dei enno står på føtene. Auga skal rotna i hòlene sine og tunga rotna i munnen på dei.

¹³Den dagen kjem det ei stor HERRENS forvirring over dei, så dei grip fatt i kvarandre og slåst mann mot mann.

¹⁴Også Juda skal strida mot Jerusalem. — Rikdomen frå alle folkeslaga omkring skal samlast inn, gull og sølv og klede i store mengder. —

¹⁵Den same plaga skal råka hesten, muldyret, kamelen, eselet og alle andre dyr som er i leirane.

¹⁶Då skal dei som blir att av alle folkeslaga som kom mot Jerusalem, år etter år fara opp for å tilbe kongen, HERREN over hærskarane, og feira lauvhyttefesten.

¹⁷Om nokon av slektene på jorda ikkje fer opp til Jerusalem for å tilbe kongen, HERREN over hærskarane, skal regnet ikkje falla over dei.

¹⁸Det skal heller ikkje falla over egyptarane om dei ikkje fer opp og ikkje kjem. Dei skal råkast av same plaga som HERREN lèt råka dei folkeslaga som ikkje fer opp for å feira lauvhyttefesten.

¹⁹Dette skal vera straffa for Egypt og alle folkeslaga som ikkje fer opp for å feira lauvhyttefesten.

²⁰Den dagen skal det stå «Helga til HERREN» på bjøllene til hestane, og grytene i HERRENS hus skal vera som offerskålene framfor altaret.

²¹Då skal alle grytene i Jerusalem og Juda vera helga til HERREN over hærskarane. Og alle som ofrar, skal koma og ta av dei og koka i dei. Den dagen skal det ikkje lenger vera nokon som driv handel i huset til HERREN over hærskarane.