Read nynorsk 2011 Sakarja 3 Bible Online

Sakarja 3 - nynorsk 2011 bible

Sakarja 3

¹[6] Han viste meg øvstepresten Josva, som stod framfor HERRENS engel, medan Satan stod på høgre sida hans og førte klagemål mot han.

²HERREN sa til Satan: «HERREN refsar deg, Satan! HERREN, som har valt ut Jerusalem, refsar deg! Sanneleg, denne mannen er ei vedskie raka ut or elden.»

³[7] Josva var kledd i skitne klede der han stod framfor engelen.

⁴Engelen tok til ords og sa til dei som stod framfor han: «Ta av han dei skitne kleda!» Til Josva sa han: «Sjå, eg tek bort skulda di og kler deg i festklede.»

⁵Då sa eg: «Set ein rein turban på hovudet hans!» Dei sette den reine turbanen på hovudet hans og tok på han kleda medan HERRENS engel stod der.

⁶Så gav HERRENS engel denne lovnaden til Josva:

⁷Så seier HERREN over hærskarane: Går du på mine vegar og tek deg av tenesta for meg, skal du få styra mitt hus og vakta føregardane mine. Eg gjev deg tilgang mellom dei som står her.

⁸ [8] Så høyr, Josva, øvsteprest! Du og dei andre prestane som sit framfor deg, er eit varsel. For sjå, eg lèt min tenar Spire koma.

⁹ Sjå, eg ritar ei innskrift på den steinen eg har lagt framfor Josva, denne eine steinen med sju auge, seier HERREN over hærskarane. Eg stryk ut skulda til dette landet på ein einaste dag.

¹⁰ Den dagen, seier HERREN over hærskarane, skal de be kvarandre inn under vinstokk og fikentre.