Read nynorsk 2011 Sakarja 4 Bible Online

Sakarja 4 - nynorsk 2011 bible

Sakarja 4

¹Engelen som tala med meg, vekte meg ein gong til, som når ein blir vekt frå søvnen.

²Han sa: «Kva ser du?» Eg svara: «Eg ser ein lysestake av reint gull, med ei skål øvst oppe. Ho har sju lamper. Lampene har sju røyr til veiken, til lampene øvst oppe.

³[9] Attmed staken står to oliventre, eitt til høgre og eitt til venstre for skåla.»

⁴Eg tok til ords og spurde engelen som tala med meg: «Kva er dette, herre?»

⁵Engelen som tala med meg, sa: «Veit du ikkje kva dette er?» Eg sa: «Nei, herre.»

⁶Då svara han: Dette er HERRENS ord til Serubabel: Ikkje med makt og ikkje med kraft, men med min Ande, seier HERREN over hærskarane.

⁷Kven er vel du, store fjell? Framfor Serubabel skal du bli til ei slette. Han skal føra fram sluttsteinen under jubelrop: «Nåde, nåde vere med han!»

⁸ HERRENS ord kom til meg:

⁹ Serubabels hender har tufta dette huset, og hendene hans skal fullføra det. Då skal du kjenna at HERREN over hærskarane har sendt meg til dykk.

¹⁰ For dei som viste forakt den dagen det tok til i det små, skal gleda seg når dei får sjå blysteinen i Serubabels hand. — Dei sju, det er HERRENS auge som fer over heile jorda.

¹¹Då tok eg til ords og spurde han: «Kva tyder dei to oliventrea som står til høgre og til venstre for lysestaken?»

¹²Eg tok til ords for andre gong og spurde: «Kva tyder dei to olivenkvistene attmed dei to gullrøyra som leier den gylne oljen ned frå dei?»

¹³Han sa: «Veit du ikkje kva dette er?» «Nei, herre», svara eg.

¹⁴[10] Då sa han: «Dette er dei to som er salva med olje. Dei står framfor han som er herre over heile jorda.»