Read nynorsk 2011 Sakarja 8 Bible Online

Sakarja 8 - nynorsk 2011 bible

Sakarja 8

¹Då kom ordet frå HERREN over hærskarane:

² Så seier HERREN over hærskarane: Eg brenn for Sion med stor lidenskap, med stor harme brenn eg for henne.

³ Så seier HERREN: Eg vender tilbake til Sion, eg vil bu i Jerusalem. Jerusalem skal kallast Den trufaste byen, og fjellet til HERREN over hærskarane skal kallast Det heilage fjellet.

⁴Så seier HERREN over hærskarane: Atter skal gamle menn og kvinner sitja på torga i Jerusalem, alle med stav i hand fordi dei er så gamle.

⁵Torga i byen skal fyllast av gutar og jenter som leikar.

⁶ Så seier HERREN over hærskarane: Om dette ser umogleg ut for dei som er att av folket på den tida, skulle det vera umogleg for meg? seier HERREN over hærskarane.

⁷Så seier HERREN over hærskarane: Sjå, eg frelser folket mitt frå landet der sol går opp, og frå landet der sol går ned.

⁸ Eg fører dei inn, dei skal bu i Jerusalem, dei skal vera mitt folk, og eg skal vera deira Gud i truskap og rettferd.

⁹Så seier HERREN over hærskarane: Ta mot til dykk, de som i desse dagar høyrer orda frå munnen til profetane, som dei tala den dagen då grunnmuren vart lagd til huset til HERREN over hærskarane, då tempelet skulle byggjast.

¹⁰For før den tid hadde folk ikkje noko att for strevet sitt, og dyra fekk ingenting att for sitt. Verken den som gjekk eller den som kom, fekk vera i fred for fienden, for eg sleppte alle menneske laus på kvarandre.

¹¹Men no vil eg ikkje vera som før i tida mot dei som er att av dette folket, seier HERREN over hærskarane.

¹²For i fred skal såkornet veksa, vinstokken skal bera frukt, jorda gje grøde og himmelen dogg. Eg skal gje alt dette til eigedom for dei som er att av dette folket.

¹³Slik de har vore ei forbanning mellom folkeslaga — du Judas hus og du Israels hus — slik skal de bli ei velsigning når eg frelser dykk. Ver ikkje redde, men ta mot til dykk!

¹⁴For så seier HERREN over hærskarane: Slik eg planla vondt mot dykk den gongen fedrane dykkar vekte harmen min, seier HERREN over hærskarane, og eg ikkje angra,

¹⁵slik har eg i desse dagar tvert om planlagt å gjera vel mot Jerusalem og Judas hus. Ver ikkje redde!

¹⁶[19] Dette er boda de skal halda: Snakk sant med kvarandre! Døm rett og sant i byportane, fell dommar som skaper fred.

¹⁷ Tenk ikkje ut vondt mot kvarandre i hjartet, elsk ikkje falsk eid! For alt slikt hatar eg, seier HERREN.

¹⁸Då kom ordet frå HERREN over hærskarane til meg:

¹⁹[20] Så seier HERREN over hærskarane: Fasta i den fjerde, femte, sjuande og tiande månaden skal bli til fryd og glede for Judas hus og til glade høgtidsdagar. Elsk sanning og fred!

²⁰Så seier HERREN over hærskarane: Endå ein gong skal folka koma, dei som bur i store byar.

²¹Dei som bur i éin by, skal fara til ein annan og seia: «Kom, lat oss gå og be om velvilje for HERRENS andlet, søkja HERREN over hærskarane! Eg òg vil gå med.»

²²Mange folk og mektige folkeslag skal koma og søkja HERREN over hærskarane i Jerusalem og be om velvilje for HERRENS andlet.

²³Så seier HERREN over hærskarane: I dei dagane skal ti mann av alle språk og folkeslag gripa tak i kappefliken til ein judeisk mann og seia: «Lat oss få gå med dykk, for vi har høyrt at Gud er med dykk.»