Read nynorsk 2011 Matteus 1 Bible Online

Matteus 1 - nynorsk 2011 bible

Matteus 1

¹[1] Dette er ættetavla til Jesus Kristus, Davids son og Abrahams son: [2]

²Abraham fekk sonen Isak, Isak fekk Jakob, Jakob fekk Juda og brørne hans.

³Juda fekk sønene Peres og Serah med Tamar. Peres fekk sonen Hesron, Hesron fekk Aram,

⁴Aram fekk Amminadab, Amminadab fekk Nahsjon, Nahsjon fekk Salma,

⁵Salma fekk sonen Boas med Rahab, Boas fekk sonen Obed med Rut, Obed fekk Isai,

⁶og Isai vart far til David, kongen. David fekk sonen Salomo med kona til Uria,

⁷Salomo fekk sonen Rehabeam, Rehabeam fekk Abia, Abia fekk Asa,

⁸Asa fekk Josjafat, Josjafat fekk Joram, Joram fekk Ussia,

⁹Ussia fekk Jotam, Jotam fekk Ahas, Ahas fekk Hiskia,

¹⁰Hiskia fekk Manasse, Manasse fekk Amon, Amon fekk Josjia,

¹¹og Josjia vart far til Jojakin og brørne hans; det var på den tid då folket vart bortført til Babylon.

¹²Etter at dei vart førte til Babylon, fekk Jojakin sonen Sjealtiel, Sjealtiel fekk Serubabel,

¹³Serubabel fekk Abiud, Abiud fekk Eljakim, Eljakim fekk Asor,

¹⁴Asor fekk Sadok, Sadok fekk Akim, Akim fekk Eliud,

¹⁵Eliud fekk Eleasar, Eleasar fekk Mattan, Mattan fekk Jakob,

¹⁶og Jakob vart far til Josef, mannen til Maria. Av henne vart Jesus fødd, han som blir kalla Kristus.

¹⁷Slik er det i alt fjorten slektsledd frå Abraham til David, fjorten slektsledd frå David til bortføringa til Babylon og fjorten slektsledd frå bortføringa til Babylon fram til Kristus.

¹⁸[3] Då Jesus Kristus vart fødd, gjekk det såleis til: Mor hans, Maria, var lova bort til Josef. Men før dei kom saman, viste det seg at ho var med barn ved Den heilage ande.

¹⁹Josef, mannen hennar, var ein rettvis mann og ville ikkje føra skam over henne; han sette seg føre å skilja seg frå henne i det stille.

²⁰Då han hadde tenkt ut dette, synte ein engel frå Herren seg for han i ein draum og sa: «Josef, Davids son! Ver ikkje redd å ta Maria heim til deg som kona di. For barnet som er avla i henne, er av Den heilage ande.

²¹[4] Ho skal føda ein son, og du skal gje han namnet Jesus, for han skal frelsa folket sitt frå syndene deira.»

²²Alt dette hende så det skulle oppfyllast, det Herren har tala gjennom profeten:

²³ [5] Sjå, møya skal bli med barn og føda ein son, og dei skal gje han namnet Immanuel — det tyder: Gud med oss.

²⁴Då Josef vakna frå søvnen, gjorde han som Herrens engel hadde bode han og tok Maria heim til seg som kona si

²⁵og levde ikkje saman med henne før ho hadde fødd son sin. Og han gav han namnet Jesus.