Read nynorsk 2011 Matteus 11 Bible Online

Matteus 11 - nynorsk 2011 bible

Matteus 11

¹Då Jesus hadde fullført talen og sagt det han ville påleggja dei tolv læresveinane sine, drog han derifrå og tok til å undervisa og forkynna kring i byane.

²I fengselet fekk Johannes høyra om alt Kristus gjorde. Han sende bod med læresveinane sine og spurde:

³[53] «Er du den som skal koma, eller skal vi venta ein annan?»

⁴Jesus svara: «Gå og fortel Johannes kva de høyrer og ser:

⁵ Blinde ser, og lamme går, spedalske blir reine, og døve høyrer, døde står opp, og den gode bodskapen blir forkynt for fattige.

⁶Sæl er den som ikkje fell ifrå på grunn av meg.»

⁷Då dei gjekk bort, tok Jesus til å tala til folket om Johannes: «Kva gjekk de ut i øydemarka for å sjå? Eit sivstrå som svaiar i vinden?

⁸Nei! Kva gjekk de ut for å sjå? Ein mann med fine klede? Dei som går i fine klede, held til i slotta hos kongane.

⁹Kva gjekk de då ut for å sjå? Ein profet? Ja, eg seier dykk: meir enn ein profet!

¹⁰Det er om han dette er skrive: Sjå, eg sender min bodberar føre deg, han skal rydda vegen for deg.

¹¹Sanneleg, eg seier dykk: Mellom dei som er fødde av kvinner, har det aldri stått fram nokon større enn døyparen Johannes. Men den minste i himmelriket er større enn han.

¹²Frå Johannes døyparens dagar og til no trengjer himmelriket seg fram, og dei som trengjer på, riv det til seg.

¹³For heilt til Johannes kom, har alle profetane og lova tala om det som skulle henda.

¹⁴[54] Og om de vil ta imot det: Han er den Elia som skulle koma.

¹⁵Den som har øyre, høyr!

¹⁶Men kva skal eg likna denne slekta med? Ho er lik born som sit på torget og ropar til kvarandre:

¹⁷‘Vi spela på fløyte for dykk, men de ville ikkje dansa. Vi song klagesongar, men de ville ikkje sørgja.’

¹⁸For Johannes kom; han verken åt eller drakk, og folk seier: ‘Han har ei vond ånd i seg.’

¹⁹[55] Menneskesonen kom; han et og drikk, og dei seier: ‘Sjå, for ein storetar og vindrikkar, ven med tollarar og syndarar!’ — Men Visdomen har fått rett, det stadfester gjerningane hennar.»

²⁰Så tok Jesus til å refsa dei byane der han hadde gjort dei fleste av sine mektige gjerningar, fordi dei ikkje hadde vendt om:

²¹[56] «Ve deg, Korasin! Ve deg, Betsaida! Hadde dei mektige gjerningane som er gjorde hos dykk, vore gjorde i Tyros og Sidon, hadde dei for lenge sidan vendt om og kledd seg i sekk og oske.

²²Men det seier eg dykk: På dommedag skal Tyros og Sidon sleppa lettare enn de.

²³Og du, Kapernaum — skal du opphøgjast like til himmelen? Nei, til dødsriket skal du støytast ned! Hadde dei mektige gjerningane som er gjorde hos deg, vore gjorde i Sodoma, hadde byen stått til denne dag.

²⁴Men det seier eg dykk: På dommedag skal det gå Sodoma-landet likare enn deg.»

²⁵På den tid tok Jesus til orde og sa: «Eg lovar deg, Far, Herre over himmel og jord, fordi du har løynt dette for vise og forstandige, men openberra det for umyndige små.

²⁶Ja, Far, for dette var din gode vilje.

²⁷Alt har Far min overgjeve til meg. Ingen kjenner Sonen, utan Faderen, og ingen kjenner Faderen, utan Sonen og den som Sonen vil openberra det for.

²⁸Kom til meg, alle de som slit og har tungt å bera; eg vil gje dykk kvile!

²⁹Ta mitt åk på dykk og lær av meg, for eg er mild og mjuk i hjartet; så skal de finna kvile for dykkar sjel.

³⁰For mitt åk er godt, og mi bør er lett.»