Read nynorsk 2011 Matteus 18 Bible Online

Matteus 18 - nynorsk 2011 bible

Matteus 18

¹I same stunda kom læresveinane til Jesus og spurde: «Kven er den største i himmelriket?»

²Då kalla han til seg eit lite barn, sette det midt imellom dei

³og sa: «Sanneleg, eg seier dykk: Utan at de vender om og blir som born, kjem de ikkje inn i himmelriket.

⁴Den som gjer seg sjølv liten som dette barnet, han er den største i himmelriket.

⁵Og den som tek imot eit slikt lite barn i mitt namn, tek imot meg.

⁶Men den som lokkar til fall ein av desse små som trur på meg, han var betre tent med å få ein kvernstein hengd om halsen og bli søkkt i havsens djup.

⁷Ve denne verda som lokkar til fall! Forføringane må koma, men ve det mennesket som dei kjem frå!

⁸Om handa eller foten lokkar deg til fall, så hogg dei av og kast dei frå deg! Det er betre for deg å gå lemlesta eller halt inn til livet enn å ha to hender og to føter og bli kasta i den evige elden.

⁹Og om auget lokkar deg til fall, så riv det ut og kast det frå deg! Det er betre for deg å gå einøygd inn til livet enn å ha to auge og bli kasta i helvetes eld.

¹⁰Ta dykk i vare så de ikkje ser med forakt på ein einaste av desse små! For eg seier dykk: Dei har sine englar i himmelen som alltid ser andletet til min himmelske Far.

¹¹[97] {{For Menneskesonen er komen for å frelsa det som var tapt.}}

¹²Kva meiner de? Om ein mann har hundre sauer og ein av dei går seg vill, lèt han ikkje då dei nittini vera att i fjellet og går av stad og leitar etter den som er komen på avvegar?

¹³Sanneleg, eg seier dykk: Skulle han finna sauen, då gler han seg meir over denne eine enn over dei nittini som ikkje gjekk seg vill.

¹⁴Slik vil heller ikkje Far dykkar i himmelen at ein einaste av desse små skal gå tapt.

¹⁵[98] Syndar bror din {{mot deg}}, så gå til han og still han til ansvar på tomannshand! Høyrer han på deg, har du vunne bror din.

¹⁶Men vil han ikkje høyra, så ta med deg ein eller to til, for etter to eller tre manns vitnemål skal kvar sak vera avgjord.

¹⁷[99] Høyrer han ikkje på dei, så sei det til forsamlinga. Men vil han ikkje høyra på forsamlinga heller, skal han vera som ein heidning eller ein tollar for deg.

¹⁸Sanneleg, eg seier dykk: Alt det de bind på jorda, skal vera bunde i himmelen, og alt det de løyser på jorda, skal vera løyst i himmelen.

¹⁹Like eins seier eg dykk: Dersom to av dykk her på jorda blir samde om å be om noko, kva det enn er, skal dei få det av Far min i himmelen.

²⁰For der to eller tre er samla i mitt namn, der er eg midt iblant dei.»

²¹Då gjekk Peter fram til Jesus og spurde: «Herre, kor mange gonger skal bror min kunna synda mot meg og eg likevel tilgje han? Så mykje som sju gonger?»

²²Jesus svara: «Ikkje sju gonger, seier eg deg, men sytti gonger sju!

²³Difor kan himmelriket liknast med ein konge som ville gjera opp rekneskapen med tenarane sine.

²⁴[100] Då han tok til med oppgjeret, førte dei fram for han ein som var skuldig ti tusen talentar.

²⁵Han hadde ikkje noko å betala med, og herren baud at han skulle seljast, både han og kona hans og borna og alt han eigde, så gjelda kunne betalast.

²⁶Men tenaren fall på kne for han og bad: ‘Ver tolmodig med meg, så skal eg betala deg alt saman.’

²⁷[101] Herren fekk inderleg medkjensle med han, sleppte han fri og ettergav han skulda.

²⁸[102] Då tenaren kom ut, møtte han ein medtenar som skulda han hundre denarar. Han greip medtenaren, tok strupetak på han og sa: ‘Betal det du skuldar!’

²⁹Medtenaren fall ned for han og bad: ‘Ver tolmodig med meg, så skal eg betala deg.’

³⁰Men han ville ikkje. Han gjekk av stad og sette medtenaren sin i fengsel; der skulle han sitja til han hadde betalt skulda.

³¹Då dei andre tenarane såg det som hende, vart dei svært sorgfulle. Dei gjekk til herren sin og fortalde han alt som var hendt.

³²Då kalla herren tenaren til seg att og sa til han: ‘Du vonde tenar! Heile skulda ettergav eg deg fordi du bad meg om det.

³³Skulle ikkje du òg ha vist miskunn mot medtenaren din, slik eg viste miskunn mot deg?’

³⁴Og herren vart sint og overgav tenaren til fangevaktarar som skulle mishandla han til han hadde betalt heile skulda.

³⁵Slik skal Far min i himmelen gjera med kvar ein av dykk som ikkje av hjartet tilgjev bror sin.»