Read nynorsk 2011 Matteus 20 Bible Online

Matteus 20 - nynorsk 2011 bible

Matteus 20

¹Himmelriket kan liknast med ein jordeigar som gjekk ut tidleg om morgonen for å leiga arbeidsfolk til vingarden sin.

²Han vart samd med arbeidarane om ein denar for dagen og sende dei bort i vingarden.

³[105] Så gjekk han ut omkring den tredje timen og fekk sjå nokre andre som stod ledige på torget.

⁴Han sa til dei: ‘Gå bort i vingarden, de òg! Så skal eg gje dykk det som er rett.’

⁵Og dei gjekk. Sidan gjekk han ut omkring den sjette og den niande timen og gjorde like eins.

⁶Då det leid til den ellevte timen, gjekk han ut att og fann endå nokre som stod der. Han seier til dei: ‘Kvifor står de her arbeidslause heile dagen?’

⁷‘Fordi ingen har leigd oss’, svara dei. Då sa han: ‘Gå bort i vingarden, de òg.’

⁸Då det leid til kvelds, sa vingardseigaren til forvaltaren sin: ‘Kall fram arbeidsfolket og lat dei få løna si! Ta til med dei siste og hald fram til dei første.’

⁹Så kom dei som var leigde omkring den ellevte timen, og fekk ein denar kvar.

¹⁰Då dei første kom, venta dei å få meir; men dei fekk kvar sin denar, dei òg.

¹¹Dei tok imot pengane, murra mot jordeigaren

¹²og sa: ‘Dei som kom sist, har ikkje arbeidd meir enn ein time, og så set du dei likt med oss som har slite og sveitta heile dagen!’

¹³Han sa til ein av dei: ‘Ven, eg gjer deg ikkje urett. Var vi ikkje samde om ein denar?

¹⁴Ta ditt og gå! Men eg vil gje han som kom sist, like mykje som deg.

¹⁵Har eg ikkje lov å gjera som eg vil med det som er mitt? Eller ser du med vonde auge på at eg er god?’

¹⁶Såleis skal dei siste bli dei første og dei første dei siste.»

¹⁷Jesus drog no opp til Jerusalem. På vegen tok han dei tolv læresveinane til sides og sa til dei:

¹⁸«Sjå, vi går opp til Jerusalem, og Menneskesonen skal gjevast over til overprestane og dei skriftlærde. Dei skal dømma han til døden

¹⁹[106] og gje han over til heidningane, så han blir spotta, piska og krossfest. Og tredje dagen skal han reisast opp.»

²⁰Då kom mor til Sebedeus-sønene til han med sønene sine og fall på kne for å be han om noko.

²¹«Kva er det du vil?» spurde han. Ho svara: «Lov meg at desse to sønene mine skal få sitja ved sida av deg i riket ditt, den eine på høgre og den andre på venstre sida.»

²²«De veit ikkje kva de bed om», sa Jesus. «Kan de drikka det begeret eg skal drikka?» «Det kan vi», svara dei.

²³Då sa han: «Mitt beger skal de drikka, men kven som skal sitja på mi høgre og venstre side, er det ikkje mi sak å avgjera. Der skal dei sitja som Far min har gjort i stand for.»

²⁴Då dei ti andre høyrde dette, vart dei sinte på dei to brørne.

²⁵Men Jesus kalla dei til seg og sa: «De veit at fyrstane over folka undertrykkjer dei, og stormennene deira styrer med hard hand.

²⁶Men slik skal det ikkje vera blant dykk. Den som vil bli stor mellom dykk, skal vera tenaren dykkar;

²⁷og den som vil vera den første av dykk, skal vera slaven dykkar.

²⁸[107] Menneskesonen er heller ikkje komen for å la seg tena, men for sjølv å tena og gje livet sitt til løysepenge for mange.»

²⁹Då dei tok ut frå Jeriko, følgde det mykje folk med han.

³⁰[108] Ved vegen sat det to blinde, og då dei høyrde at Jesus gjekk framom, ropa dei: «Herre, du Davids son, miskunna deg over oss!»

³¹Folket tala hardt til dei og bad dei teia, men dei ropa endå høgare: «Herre, du Davids son, miskunna deg over oss!»

³²Då stansa Jesus, kalla på dei og sa: «Kva vil de at eg skal gjera for dykk?»

³³«Lat auga våre bli opna, Herre!» svara dei.

³⁴[109] Jesus fekk inderleg medkjensle med dei og rørte ved auga deira. Straks kunne dei sjå, og dei følgde han.