Read nynorsk 2011 Matteus 24 Bible Online

Matteus 24 - nynorsk 2011 bible

Matteus 24

¹Så gjekk Jesus bort frå tempelet. Då han var på veg ut, kom læresveinane til han og peika på tempelbygningane.

²Men han sa: «Ja, ser de alt dette? Sanneleg, eg seier dykk: Her skal ikkje liggja att stein på stein, alt skal rivast ned.»

³Då han sat på Oljeberget og læresveinane var åleine med han, kom dei til han og spurde: «Sei oss: Når skal dette henda? Og kva er teiknet på di atterkome og enden på verda?»

⁴Jesus tok til orde og sa: «Ta dykk i akt så ingen fører dykk vill!

⁵For mange skal koma i mitt namn og seia: ‘Eg er Messias.’ Og dei skal føra mange på villspor.

⁶De skal høyra om krig, og det skal gå rykte om krig. Sjå til at de ikkje lèt dykk skremma! For dette må henda, men enno er ikkje enden komen.

⁷Folk skal reisa seg mot folk og rike mot rike, og det skal vera hungersnaud og jordskjelv på stad etter stad.

⁸Men alt dette er berre byrjinga på fødselsriene.

⁹Då skal dei gje dykk over til forfølging og slå dykk i hel. Ja, alle folk skal hata dykk for mitt namn skuld.

¹⁰Mange skal då falla frå, og dei skal svika kvarandre og hata kvarandre.

¹¹Mange falske profetar skal stiga fram og føra mange vill.

¹²Og fordi lovløysa har vorte så stor, skal kjærleiken kolna hos dei fleste.

¹³Men den som held ut til enden, skal bli frelst.

¹⁴Og dette evangeliet om riket skal forkynnast i heile verda til vitnemål for alle folkeslag, og så skal enden koma.

¹⁵[125] Når de då ser at det motbydelege som øydelegg, som profeten Daniel har tala om, står på heilag stad — lat den som les opp, tyda det!

¹⁶— då må dei som er i Judea, rømma til fjells;

¹⁷[126] den som er på taket, må ikkje gå ned og henta noko i huset;

¹⁸og den som er ute på marka, må ikkje gå heim etter kappa si.

¹⁹Ve dei som ventar barn og dei som gjev bryst i dei dagane!

²⁰Men be om at de må sleppa å rømma om vinteren eller på ein sabbat!

²¹For då skal det koma ei trengselstid så stor som det aldri har vore frå verda vart skapt og til no, og som det heller aldri skal bli.

²²Og vart ikkje desse dagane avkorta, kom ikkje noko menneske til å bli frelst. Men for dei utvalde skuld skal desse dagane gjerast kortare.

²³Om nokon då seier til dykk: ‘Sjå, her er Messias’ eller: ‘Der er han’, så tru det ikkje!

²⁴For falske messiasar og falske profetar skal stå fram og gjera store teikn og under, så endå dei utvalde kan førast vill, om det er råd.

²⁵Merk dykk at eg har sagt det på førehand!

²⁶Seier dei då til dykk: ‘Han er ute i øydemarka’, så gå ikkje dit, eller: ‘Han er i eit rom der inne’, så tru det ikkje.

²⁷Som når lynet går ut frå aust og lyser like til vest, slik skal det vera når Menneskesonen kjem.

²⁸Der åtselet er, vil gribbane samlast.

²⁹Så snart denne trengselstida er over, skal sola formørkjast og månen mista sitt lys. Stjernene skal falla ned frå himmelen og kreftene i himmelrommet bli rokka.

³⁰Då skal teiknet til Menneskesonen syna seg på himmelen, då skal alle folkeslag på jorda setja i med klagerop, og dei skal sjå Menneskesonen koma på himmelskyene med stor makt og herlegdom.

³¹Medan basunen ljomar, skal han senda ut englane sine, og dei skal samla dei han har valt seg ut, frå dei fire verdshjørna, frå den eine enden av himmelen til den andre.

³²[127] Lær av ei samanlikning med fikentreet: Når det kjem sevje i greinene og lauvet sprett, då veit de at sommaren er nær.

³³Like eins veit de at han er nær, ja, rett utfor døra, når de ser alt dette.

³⁴Sanneleg, eg seier dykk: Denne slekta skal ikkje forgå før alt dette hender.

³⁵Himmel og jord skal forgå, men mine ord skal aldri forgå.

³⁶Men den dagen og timen kjenner ingen, ikkje englane i himmelen og heller ikkje Sonen, berre Faderen.

³⁷Som i Noahs dagar, så skal det vera når Menneskesonen kjem.

³⁸I tida før storflaumen åt og drakk dei, gifte seg og vart bortgifte, heilt til den dagen då Noah gjekk inn i arka,

³⁹og ingen skjøna noko før flaumen kom og tok dei alle. Slik skal det òg vera når Menneskesonen kjem.

⁴⁰Då skal to menn vera ute på marka; éin blir henta, éin blir att.

⁴¹To kvinner skal mala saman på kverna; éi blir henta, éi blir att.

⁴²Så vak då! For de veit ikkje kva dag Herren dykkar kjem.

⁴³Men det skal de vita: Dersom husherren visste kva tid på natta tjuven kom, så ville han vaka og ikkje la han bryta seg inn i huset.

⁴⁴Difor skal de vera førebudde, de òg! For Menneskesonen kjem i ein time de ikkje ventar det.

⁴⁵Kven er den trugne og kloke tenaren som herren har sett over tenestefolket sitt for å gje dei mat i rett tid?

⁴⁶Lukkeleg er den tenaren som herren finn i arbeid med dette når han kjem tilbake!

⁴⁷Sanneleg, eg seier dykk: Herren skal setja han over alt det han eig.

⁴⁸Men set at det er ein dårleg tenar som seier til seg sjølv: ‘Herren min dryger nok lenge enno’,

⁴⁹og så tek til å slå dei andre tenarane og eta og drikka i lag med stordrikkarar.

⁵⁰Då skal herren hans koma ein dag han ikkje ventar og ein time han ikkje veit av,

⁵¹og hogga han ned og la han få dela lagnad med hyklarane. Der skal dei gråta og skjera tenner.