Read nynorsk 2011 Matteus 3 Bible Online

Matteus 3 - nynorsk 2011 bible

Matteus 3

¹[9] På den tid steig døyparen Johannes fram og forkynte i øydemarka i Judea.

²[10] Han sa: «Vend om, for himmelriket er kome nær!»

³Det er om han profeten Jesaja talar når han seier: Ei røyst ropar i øydemarka: «Rydd Herrens veg, gjer stigane hans rette!»

⁴Johannes hadde ei kappe av kamelhår og lêrbelte om livet, og maten hans var grashopper og villhonning.

⁵Folket i Jerusalem og heile Judea og landet langsmed Jordan drog ut til han.

⁶Og dei sanna syndene sine og vart døypte av han i Jordanelva.

⁷[11] Men då han såg at mange av farisearane og saddukearane kom for å bli døypte, sa han til dei: «Ormeyngel! Kven har lært dykk korleis de skal sleppa unna den vreiden som skal koma?

⁸Ber då frukt som viser at de er omvende!

⁹Og tru ikkje at de kan seia til dykk sjølve: ‘Vi har Abraham til far.’ For eg seier dykk: Gud kan vekkja opp born for Abraham av desse steinane.

¹⁰Øksa ligg alt innmed rota på trea; kvart tre som ikkje ber god frukt, blir hogge ned og kasta på elden.

¹¹Eg døyper dykk med vatn til omvending. Men han som kjem etter meg, er sterkare enn eg. Eg er ikkje eingong verdig til å ta av han sandalane. Han skal døypa dykk med Den heilage ande og eld.

¹²[12] Han har kasteskovla i handa og skal reinsa kornet på treskjeplassen. Kveiten sin skal han samla i låven, men agnene skal han brenna med eld som aldri sloknar.»

¹³Då kom Jesus frå Galilea til Johannes ved Jordan for å bli døypt av han.

¹⁴Men Johannes ville hindra han og sa: «Eg treng dåp av deg, og så kjem du til meg?»

¹⁵Jesus svara: «Lat det no skje! Dette må vi gjera for å oppfylla all rettferd.» Då gjorde Johannes som Jesus ville.

¹⁶Med det same Jesus var døypt, steig han opp av vatnet. Og sjå, himmelen opna seg, og han såg Guds Ande koma dalande ned over seg som ei due.

¹⁷Og det lydde ei røyst frå himmelen: «Dette er Son min, han som eg elskar, i han har eg mi glede.»