Read nynorsk 2011 Matteus 7 Bible Online

Matteus 7 - nynorsk 2011 bible

Matteus 7

¹Døm ikkje, så de ikkje sjølve skal bli dømde!

²Etter dommen de dømmer med, skal de sjølve dømmast, og i det same målet de sjølve måler med, skal det målast opp til dykk.

³Kvifor ser du flisa i auget til bror din, men bjelken i ditt eige auge merkar du ikkje?

⁴Eller korleis kan du seia til bror din: ‘Lat meg ta flisa ut av auget ditt’ når det er ein bjelke i ditt eige?

⁵Din hyklar! Ta først bjelken ut av ditt eige auge! Då ser du klårt og kan ta flisa ut av auget til bror din.

⁶Gjev ikkje hundane det som er heilagt, og kast ikkje perler til svin. Dei kjem berre til å trakka dei ned og venda seg mot dykk og riva dykk sund.

⁷Be, så skal de få. Leit, så skal de finna. Bank på, så skal det latast opp for dykk.

⁸For kvar den som bed, han får; og den som leitar, han finn, og den som bankar på, skal det latast opp for.

⁹Eller kven av dykk gjev son sin ein stein når han bed om brød,

¹⁰eller ein orm når han bed om fisk?

¹¹Når då de som er vonde, veit å gje borna dykkar gode gåver, kor mykje meir skal ikkje då Far dykkar i himmelen gje gode gåver til dei som bed han!

¹²Alt de vil at andre skal gjera mot dykk, skal de òg gjera mot dei. For det er dette lova og profetane seier.

¹³Gå inn gjennom den tronge porten! For vid er porten og brei er vegen som fører til fortaping, og mange er dei som går inn gjennom den.

¹⁴Men trong er den porten og smal er den vegen som fører til livet, og få er dei som finn han.

¹⁵Ta dykk i vare for dei falske profetane! Dei kjem til dykk i saueham, men innvendig er dei grådige ulvar.

¹⁶På fruktene skal de kjenna dei. Kan ein plukka druer av klunger eller fiken av tistlar?

¹⁷Eit godt tre ber god frukt, eit dårleg tre ber dårleg frukt.

¹⁸Eit godt tre kan ikkje bera dårleg frukt, og eit dårleg tre kan ikkje bera god frukt.

¹⁹Kvart tre som ikkje ber god frukt, blir hogge ned og kasta på elden.

²⁰Difor skal de kjenna dei på fruktene.

²¹Ikkje alle som seier til meg: ‘Herre, Herre!’ skal koma inn i himmelriket, men den som gjer det Far min i himmelen vil.

²²Mange skal seia til meg på den dagen: ‘Herre, Herre! Har vi ikkje tala profetord i ditt namn, drive ut vonde ånder i ditt namn og gjort mange mektige gjerningar i ditt namn?’

²³Då skal eg seia det beint ut: ‘Eg har aldri kjent dykk. Gå bort frå meg, de som gjer urett!’

²⁴Den som høyrer desse orda mine og gjer det dei seier, liknar ein klok mann som bygde huset sitt på fjell.

²⁵Regnet silte, elvane fløymde, og vindane bles og slo mot huset. Men det fall ikkje, for det var tufta på fjell.

²⁶Men den som høyrer desse orda mine og ikkje gjer det dei seier, liknar ein uforstandig mann som bygde huset sitt på sand.

²⁷Regnet silte, elvane fløymde, og vindane bles og slo mot huset. Då fall det, og fallet var stort.»

²⁸Då Jesus hadde fullført denne talen, var folket fulle av undring over læra hans.

²⁹For han lærte dei med myndig tale og ikkje som deira skriftlærde.