Read nynorsk 2011 Matteus 8 Bible Online

Matteus 8 - nynorsk 2011 bible

Matteus 8

¹Så gjekk Jesus ned frå fjellet, og mykje folk følgde han.

²[35] No kom det ein mann som var spedalsk, kasta seg ned for han og sa: «Herre, om du vil, kan du gjera meg rein.»

³Jesus rette ut handa og rørte ved han. «Eg vil», sa han. «Bli rein!» Og med det same vart han reinsa for sjukdomen sin.

⁴Då sa Jesus til han: «Sei ikkje dette til nokon, men gå og vis deg for presten og ber fram det offeret som Moses har gjeve påbod om. Det skal vera eit vitnemål for dei.»

⁵Då Jesus gjekk inn i Kapernaum, kom det ein offiser til han og bad om hjelp:

⁶«Herre», sa han, «tenesteguten min ligg lam heime og har svære plager.»

⁷Jesus sa: «Eg skal koma og lækja han.»

⁸«Herre», svara offiseren, «eg er ikkje verdig til at du kjem inn under mitt tak. Men sei berre eit ord, så blir tenesteguten min lækt.

⁹For eg må sjølv lyda dei som er over meg, og eg har soldatar under meg. Seier eg til éin: ‘Gå!’ så går han, og til ein annan: ‘Kom!’ så kjem han, og til tenaren min: ‘Gjer dette!’ så gjer han det.»

¹⁰Då Jesus høyrde det, undra han seg og sa til dei som følgde han: «Sanneleg, eg seier dykk: Ikkje hos nokon i Israel har eg funne slik ei tru.

¹¹Og det skal de vita: Mange skal koma frå aust og frå vest og sitja til bords med Abraham og Isak og Jakob i himmelriket.

¹²Men borna av riket skal kastast ut i mørkret utanfor, der dei græt og skjer tenner.»

¹³Og Jesus sa til offiseren: «Gå! Det skal skje, slik du trudde.» Og tenesteguten vart frisk i same stunda.

¹⁴Då Jesus kom heim til Peter, fekk han sjå at svigermor hans låg og hadde feber.

¹⁵Han rørte ved handa hennar. Då gav feberen seg, og ho stod opp og tente han.

¹⁶Då det vart kveld, kom dei til han med mange som hadde vonde ånder. Han dreiv ut åndene med eit ord og lækte alle som var sjuke.

¹⁷Slik skulle det oppfyllast, det ordet som er tala gjennom profeten Jesaja: Han tok bort våre plager og bar våre sjukdomar.

¹⁸Då Jesus såg så mykje folk omkring seg, gav han bod om å fara over til andre sida av sjøen.

¹⁹[36] Ein skriftlærd kom til han og sa: «Meister, eg vil følgja deg kvar du så går.»

²⁰[37] Jesus svara: «Revane har hi, og fuglane under himmelen har reir, men Menneskesonen har ikkje noko han kan kvila hovudet på.»

²¹Ein annan, ein av læresveinane, sa til han: «Herre, lat meg først få gå heim og gravleggja far min.»

²²Men Jesus svara: «Følg du meg, og lat dei døde gravleggja sine døde.»

²³Han gjekk ut i båten, og læresveinane følgde han.

²⁴Og sjå, det bles opp til storm på sjøen, og bølgjene slo over båten. Men Jesus sov.

²⁵Då gjekk dei bort og vekte han og sa: «Herre, frels oss! Vi går under!»

²⁶Han svara: «Kvifor er de så redde — de lite truande!» Så reiste han seg og truga vindane og sjøen, og det vart blikande stilt.

²⁷Mennene undra seg og sa: «Kva er dette for ein? Både vind og sjø lyder han!»

²⁸[38] Då Jesus kom over på andre sida, til Gadarenar-landet, kom to som hadde vonde ånder, mot han ut frå gravhòlene. Dei var så ville at ingen kunne koma fram den vegen.

²⁹Dei sette i å ropa: «Kva vil du oss, du Guds Son? Er du komen hit for å pina oss før tida?»

³⁰Eit godt stykke derifrå gjekk det ein stor griseflokk og beitte.

³¹Og dei vonde åndene bad han: «Om du driv oss ut, så send oss inn i griseflokken.»

³²«Far av stad!» sa Jesus. Og dei fór ut or mennene og inn i grisene. Då sette heile flokken utfor eit stup og ned i sjøen, og der drukna dei.

³³Dei som gjette grisene, rømde og sprang inn til byen. Der fortalde dei alt og sa korleis det hadde gått med dei som hadde hatt vonde ånder.

³⁴Heile byen kom ut for å møta Jesus. Og då dei fekk sjå han, bad dei han fara bort frå bygdene deira.