Read nynorsk 2011 Lukas 15 Bible Online

Lukas 15 - nynorsk 2011 bible

Lukas 15

¹[129] Alle tollarane og syndarane heldt seg nær ved Jesus og høyrde på han.

²Men farisearane og dei skriftlærde murra og sa seg imellom: «Denne mannen tek imot syndarar og et i lag med dei.»

³Då fortalde han dei denne likninga:

⁴«Om ein av dykk har hundre sauer og mistar éin av dei, lèt han ikkje då dei nittini vera att ute i øydemarka og går av stad og leitar etter den bortkomne sauen til han finn han?

⁵Og når han har funne han, blir han glad og tek han på akslene sine.

⁶Straks han kjem heim, kallar han saman vener og naboar og seier til dei: ‘Gled dykk med meg! Eg har funne att den sauen som var bortkomen.’

⁷Eg seier dykk: På same måten er det større glede i himmelen over éin syndar som vender om, enn over nittini rettferdige som ikkje treng omvending.

⁸[130] Eller om ei kvinne har ti sølvpengar og mistar éin, tenner ho ikkje då ei lampe og sopar heile huset og leitar vel til ho finn han?

⁹Og når ho har funne han, kallar ho saman veninner og nabokoner og seier: ‘Gled dykk med meg! Eg har funne att det pengestykket eg hadde mista.’

¹⁰På same måten, seier eg dykk, blir det glede mellom Guds englar over éin syndar som vender om.»

¹¹Jesus sa: «Ein mann hadde to søner.

¹²[131] Den yngste sa til far sin: ‘Far, lat meg få den delen av formuen som fell på meg.’ Så skifte han eigedomen sin mellom dei.

¹³Ikkje mange dagane etter selde den yngste sonen alt det han eigde, og drog til eit land langt borte. Der levde han eit vilt liv og sløste bort formuen sin.

¹⁴Då han hadde sett alt over styr, vart det uår og svolt i landet, og han tok til å lida naud.

¹⁵Han gjekk då til ein av mennene der i landet og bad om arbeid, og mannen sende han ut på markene sine for å gjeta grisene.

¹⁶Han ønskte berre å få metta seg med dei belgfruktene som grisene åt, men ingen gav han noko.

¹⁷Då gjekk han i seg sjølv og sa: ‘Kor mange leigekarar heime hos far min har ikkje fullt opp av mat, og her går eg og svelt i hel!

¹⁸Eg vil bryta opp og gå heim til far min og seia: Far, eg har synda mot Himmelen og mot deg.

¹⁹Eg er ikkje verd å kallast son din lenger. Men lat meg få vera som ein av leigekarane dine.’

²⁰[132] Så braut han opp og gjekk heim til far sin. Medan han endå var langt borte, fekk faren sjå han, og han fekk inderleg medkjensle med han. Han sprang imot han, kasta seg om halsen på han og kyste han.

²¹[133] Då sa sonen: ‘Far, eg har synda mot Himmelen og mot deg. Eg er ikkje verd å kallast son din lenger.’

²²Men faren sa til tenarane: ‘Skund dykk! Finn fram dei beste kleda og ha dei på han, og lat han få ring på fingeren og skor på føtene.

²³Hent så gjøkalven og slakt han, og lat oss halda måltid og feira.

²⁴For denne sonen min var død og har vorte levande, han var bortkomen og er attfunnen.’ Og så tok festen og gleda til.

²⁵Den eldste sonen var ute på marka. Då han gjekk heimover og nærma seg garden, høyrde han spel og dans.

²⁶Han ropa på ein av karane og spurde kva som stod på.

²⁷‘Bror din er komen’, svara han, ‘og far din har slakta gjøkalven fordi han fekk han velberga heim att.’

²⁸Då vart han sint og ville ikkje gå inn. Far hans kom ut og prøvde å overtala han.

²⁹Men han svara attende: ‘No har eg tent deg i alle år og aldri sett meg opp mot dine bod. Men meg har du ikkje gjeve så mykje som eit kje, så eg kunne halda fest saman med venene mine.

³⁰Men når han kjem heim, denne son din som har sløst bort pengane dine i lag med horer, då slaktar du gjøkalven for han!’

³¹Då sa far hans: ‘Du er alltid hos meg, barnet mitt, og alt mitt er ditt.

³²Men no må vi halda fest og vera glade. For denne bror din var død og har vorte levande, han var bortkomen og er attfunnen.’»