Read nynorsk 2011 Lukas 17 Bible Online

Lukas 17 - nynorsk 2011 bible

Lukas 17

¹Han sa til læresveinane sine: «Det må koma forføringar, noko anna er ikkje råd. Men ve den som forføringane kjem ifrå!

²Det var betre for han å bli kasta i havet med ein møllestein om halsen enn at han skulle lokka ein av desse små til fall.

³Ta dykk i vare! Syndar bror din, så tal han til rette, og angrar han, så tilgjev han.

⁴Ja, om han syndar mot deg sju gonger same dagen og sju gonger kjem til deg og seier: ‘Eg angrar’, så skal du tilgje han.»

⁵Apostlane sa til Herren: «Gjev oss større tru!»

⁶[141] Herren svara: «Hadde de tru som eit sennepsfrø, kunne de seia til dette morbærtreet: ‘Rykk deg opp og slå rot i havet!’ Og det skulle lyda dykk.

⁷Om ein av dykk har ein tenar som er ute og pløyer eller gjeter, seier han då til tenaren når han kjem heim frå marka: ‘Kom no og set deg til bords?’

⁸Nei, han vil seia: ‘Lag til kveldsmat, bind opp kjortelen og stå til teneste for meg medan eg et og drikk. Sidan kan du sjølv få deg mat.’

⁹[142] Takkar han tenaren for at han gjorde det han var pålagd?

¹⁰På same måten er det med dykk: Når de har gjort alt de var pålagde, skal de seia: ‘Vi er unyttige tenarar og har berre gjort det vi var skuldige å gjera.’»

¹¹[143] Medan Jesus var på vegen til Jerusalem, drog han gjennom grenselandet mellom Samaria og Galilea.

¹²Då han skulle gå inn i ein landsby, kom det ti spedalske menn imot han. Dei vart ståande langt unna

¹³[144] og ropa: «Jesus, meister, miskunna deg over oss!»

¹⁴Han såg dei og sa: «Gå og vis dykk for prestane!» Og medan dei var på veg dit, vart dei reine.

¹⁵Ein av dei kom tilbake då han såg han hadde vorte frisk. Han lova Gud med høg røyst,

¹⁶kasta seg ned for Jesu føter med andletet mot jorda og takka han. Denne mannen var ein samaritan.

¹⁷Då sa Jesus: «Vart dei ikkje reine alle ti? Kvar er så dei ni?

¹⁸Var det ingen annan enn denne framande som kom tilbake og ville gje Gud æra?»

¹⁹Og han sa til mannen: «Reis deg og gå! Trua di har frelst deg.»

²⁰Ein gong spurde farisearane Jesus når Guds rike skulle koma. Han svara: «Guds rike kjem ikkje slik at ein kan sjå det med auga.

²¹[145] Ingen kan seia: ‘Sjå her er det’ eller: ‘Der er det’. For Guds rike er midt iblant dykk.»

²²Til læresveinane sa han: «Det kjem ei tid då de skal lengta etter å sjå ein av Menneskesonens dagar, men ikkje få oppleva det.

²³Folk skal seia til dykk: ‘Sjå der’ eller: ‘Sjå, her er han’. Gå ikkje dit og spring ikkje etter dei!

²⁴For slik lynet flammar opp og lyser frå himmelrand til himmelrand, slik skal Menneskesonen koma til syne på sin dag.

²⁵Men først skal han lida mykje og bli forkasta av denne slekta.

²⁶Og som det var i Noahs dagar, slik skal det vera i Menneskesonens dagar.

²⁷Dei åt og drakk, dei gifte seg og vart bortgifte, heilt til den dagen då Noah gjekk inn i arka. Så kom storflaumen og gjorde ende på dei alle.

²⁸Eller som det var i Lots dagar: Dei åt og drakk, dei kjøpte og selde, planta og bygde.

²⁹Men den dagen Lot gjekk ut av Sodoma, regna det eld og svovel frå himmelen og gjorde ende på dei alle.

³⁰På same vis skal det vera den dagen Menneskesonen openberrar seg.

³¹Når den dagen kjem, må den som er oppe på taket og har sakene sine nede i huset, ikkje gå ned og henta dei, og den som er ute på marka, må ikkje gå heim att.

³²Kom i hug kona til Lot!

³³Den som vil tryggja livet sitt, skal mista det. Men den som mistar det, skal berga det.

³⁴Eg seier dykk: Den natta skal det liggja to i ei seng. Den eine skal hentast, den andre skal bli att.

³⁵To kvinner skal mala på same kverna. Den eine skal hentast, den andre skal bli att.

³⁶[146] {{To menn skal vera ute på marka. Den eine blir henta, den andre skal bli att.}}»

³⁷Då tok læresveinane til orde og spurde: «Kvar, Herre?» Han svara: «Der åtselet er, vil gribbane samlast.»