Read nynorsk 2011 Lukas 21 Bible Online

Lukas 21 - nynorsk 2011 bible

Lukas 21

¹[161] Jesus såg opp og fekk sjå at dei rike la gåvene sine i tempelkista.

²[162] Han la òg merke til ei fattig enkje som gav to små koparmyntar.

³Og han sa: «Sanneleg, eg seier dykk: Denne fattige enkja har gjeve meir enn nokon av dei andre.

⁴For alle dei andre la gåver i kista av si overflod, men ho gav av sin fattigdom alt det ho hadde å leva av.»

⁵Det var nokre som snakka om tempelet, kor fint det var utsmykka med vakre steinar og tempelgåver. Då sa Jesus:

⁶«Det kjem ein dag då alt de ser her, skal rivast ned; det skal ikkje liggja att stein på stein.»

⁷Då spurde dei: «Meister, når skal dette henda, og kva er teiknet på at den tida er nær?»

⁸[163] Han svara: «Ta dykk i vare så ingen fører dykk vill! For mange skal koma i mitt namn og seia: ‘Det er eg! Tida er nær!’ Følg dei ikkje!

⁹Og når de høyrer om krig og opprør, så lat dykk ikkje skremma! For først må dette henda, men enden kjem ikkje med ein gong.»

¹⁰Og han heldt fram: «Folk skal reisa seg mot folk og rike mot rike.

¹¹Det skal koma store jordskjelv, og hungersnaud og pest på stad etter stad. Det skal henda redselsfulle ting og syna seg store teikn frå himmelen.

¹²Men før alt dette hender, skal dei leggja hand på dykk og forfølgja dykk, gje dykk over til synagogane og kasta dykk i fengsel, og for mitt namn skuld skal de førast fram for kongar og landshovdingar.

¹³Då skal de få vitna for dei.

¹⁴Legg dykk på hjartet at de ikkje treng tenkja ut på førehand korleis de skal forsvara dykk.

¹⁵For eg skal leggja orda i munnen på dykk og gje dykk visdom som ingen av motstandarane dykkar skal kunna stå seg imot eller seia imot.

¹⁶Jamvel foreldre og sysken, slektningar og vener skal svika dykk og senda nokre av dykk i døden.

¹⁷Og alle skal hata dykk for mitt namn skuld.

¹⁸Men ikkje eit hårstrå på hovudet skal de mista.

¹⁹Hald ut, så skal de vinna livet!

²⁰Når de ser Jerusalem kringsett av hærar, då skal de vita at byen snart blir øydelagd.

²¹Då må dei som er i Judea, rømma til fjells, dei som er i byen, må koma seg ut, og dei som er ute på landet, må ikkje gå inn i byen.

²²For dette er straffedomens tid, då alt som står skrive, skal gå i oppfylling.

²³Ve dei som ventar barn og dei som gjev bryst i dei dagane! For det skal bli stor naud i landet, og vreide skal ramma dette folket.

²⁴Dei skal falla for sverd og førast bort som fangar til alle folkeslag. Og andre folk skal trakka Jerusalem under fot heilt til tida for heidningane er ute.

²⁵Det skal syna seg teikn i sol og måne og stjerner, og på jorda skal folka bli gripne av redsle og rådløyse i larmen frå hav og brotsjøar.

²⁶Folk skal forgå av redsle og gru for det som kjem over jorda. For kreftene i himmelrommet skal bli rokka.

²⁷Då skal dei sjå Menneskesonen koma i skya med stor makt og herlegdom.

²⁸Men når dette tek til å henda, skal de retta dykk opp og lyfta hovudet! For då skal de snart setjast fri.»

²⁹[164] Så fortalde han dei ei likning: «Sjå på fikentreet og alle andre tre!

³⁰Når lauvet sprett, då veit de av dykk sjølve at sommaren er nær.

³¹Like eins veit de at Guds rike er nær når de ser at dette hender.

³²Sanneleg, eg seier dykk: Denne slekta skal ikkje forgå før alt dette hender.

³³Himmel og jord skal forgå, men mine ord skal aldri forgå.

³⁴Ta dykk i vare og lat ikkje hjartet dykkar bli sløva av rangel og drikk og sorgene i dagleglivet, så den dagen kjem like uventa på dykk

³⁵som ei snare. For den dagen skal koma over alle som bur på jorda.

³⁶Vak kvar tid og stund og be om styrke til å koma velberga frå alt det som skal henda, og bli ståande framfor Menneskesonen.»

³⁷Om dagen var Jesus i tempelet og underviste, men om kvelden gjekk han ut til den høgda som heiter Oljeberget, og var der om natta.

³⁸Og tidleg om morgonen flokka folket seg om han på tempelplassen og høyrde på han.