Read nynorsk 2011 Lukas 3 Bible Online

Lukas 3 - nynorsk 2011 bible

Lukas 3

¹[26] Det var i det femtande styringsåret til keisar Tiberius. Pontius Pilatus var landshovding i Judea, Herodes var landsfyrste i Galilea, Filip, bror hans, i Iturea og Trakonitis, Lysanias i Abilene,

²[27] og Annas og Kaifas var øvsteprestar. Då kom Guds ord til Johannes, son til Sakarja, i øydemarka.

³[28] Og han drog omkring i heile Jordan-landet og forkynte ein omvendingsdåp som gav tilgjeving for syndene,

⁴slik som det står skrive i boka med profeten Jesajas ord: Ei røyst ropar i øydemarka: Rydd Herrens veg, gjer stigane hans rette!

⁵ Kvar dal skal fyllast, kvart fjell og kvar haug skal jamnast ut. Dei krokete vegane skal bli rette, dei steinete stigane bli slette.

⁶ Og alle menneske skal sjå Guds frelse.

⁷I flokk og følgje drog folk ut for å bli døypte av Johannes, og han sa til dei: «Ormeyngel! Kven har lært dykk korleis de skal sleppa unna den vreiden som skal koma?

⁸Så ber då frukt som viser at de er omvende! Prøv ikkje å seia til dykk sjølve: ‘Vi har Abraham til far.’ For eg seier dykk: Gud kan vekkja opp born for Abraham av desse steinane.

⁹Øksa ligg alt innmed rota på trea; kvart tre som ikkje ber god frukt, blir hogge ned og kasta på elden.»

¹⁰«Kva skal vi då gjera?» spurde folket.

¹¹Han svara: «Den som har to kjortlar, skal dela med den som ingen har, og den som har mat, skal gjera det same.»

¹²Det kom òg nokre tollarar og ville bli døypte. Dei spurde: «Meister, kva skal vi gjera?»

¹³«Krev ikkje inn meir enn det som er fastsett», svara han.

¹⁴«Og vi, kva skal vi gjera?» spurde nokre soldatar. Han svara: «Truga ikkje pengar frå nokon med vald eller falske skuldingar, men ver fornøgde med løna dykkar.»

¹⁵Folket gjekk no i venting, og alle tenkte i sitt hjarte: Tru om Johannes kan vera Messias?

¹⁶Då tok han til orde og sa til dei alle: «Eg døyper dykk med vatn. Men det kjem ein som er sterkare enn eg, og eg er ikkje eingong verdig til å løysa sandalreima hans. Han skal døypa dykk med Den heilage ande og eld.

¹⁷[29] Han har kasteskovla i handa for å reinsa kornet på treskjeplassen. Kveiten skal han samla i låven sin, men agnene skal han brenna med eld som aldri sloknar.»

¹⁸Dette og mykje anna la han folket på hjartet når han forkynte bodskapen for dei.

¹⁹[30] Men då han refsa landsfyrsten Herodes fordi han levde med Herodias, brorkona si, og gjorde mykje anna vondt,

²⁰la Herodes ei ny ugjerning til alle dei andre: Han kasta Johannes i fengsel.

²¹Alt folket lét seg no døypa, og Jesus vart òg døypt. Medan han bad, opna himmelen seg,

²²og Den heilage ande dala ned over han i skapnad av ei due. Og det kom ei røyst frå himmelen: «Du er Son min, som eg elskar, i deg har eg mi glede.»

²³Jesus var omkring tretti år gammal då han tok til med si gjerning. Han vart halden for å vera son til Josef, som var son til Eli,

²⁴son til Mattat, son til Levi, son til Melki, son til Jannai, son til Josef,

²⁵son til Mattatja, son til Amos, son til Nahum, son til Esli, son til Naggai,

²⁶son til Maat, son til Mattatja, son til Sjimi, son til Josek, son til Joda,

²⁷son til Johanan, son til Resa, son til Serubabel, son til Sjealtiel, son til Neri,

²⁸son til Melki, son til Addi, son til Kosam, son til Elmadam, son til Er,

²⁹son til Josva, son til Elieser, son til Jorim, son til Mattat, son til Levi,

³⁰son til Simeon, son til Juda, son til Josef, son til Jonam, son til Eljakim,

³¹son til Melea, son til Menna, son til Mattata, son til Natan, son til David,

³²son til Isai, son til Obed, son til Boas, son til Salma, son til Nahsjon,

³³son til Amminadab, son til Admin, son til Arni, son til Hesron, son til Peres, son til Juda,

³⁴son til Jakob, son til Isak, son til Abraham, son til Tarah, son til Nahor,

³⁵son til Serug, son til Re'u, son til Peleg, son til Eber, son til Sjelah,

³⁶son til Kenan, son til Arpaksjad, son til Sem, son til Noah, son til Lamek,

³⁷son til Metusjalah, son til Henok, son til Jared, son til Mahalalel, son til Kenan,

³⁸son til Enosj, son til Set, son til Adam, son til Gud.