Read nynorsk 2011 Lukas 9 Bible Online

Lukas 9 - nynorsk 2011 bible

Lukas 9

¹Jesus kalla saman dei tolv og gav dei makt over alle vonde ånder og kraft til å lækja sjukdomar.

²[79] Så sende han dei ut for å forkynna Guds rike og gjera sjuke friske.

³Han sa til dei: «Ta ikkje noko med dykk på vegen, korkje stav eller veske eller brød eller pengar; og ingen skal ha med to kjortlar.

⁴Når de har teke inn i eit hus, så ver der til de fer vidare.

⁵[80] Men er det nokon som ikkje vil ta imot dykk, skal de fara bort frå den byen og rista støvet av føtene. Det skal vera eit vitnemål mot dei.»

⁶Så tok dei ut og drog omkring frå landsby til landsby og forkynte den gode bodskapen og lækte folk kvar dei kom.

⁷[81] Landsfyrsten Herodes fekk høyra om alt det som hende, og han visste ikkje kva han skulle tru. For somme sa at Johannes var reist opp frå dei døde,

⁸[82] andre at det var Elia som hadde synt seg, og endå andre at det var ein av dei gamle profetane som hadde stått opp att.

⁹[83] Men Herodes sjølv sa: «Johannes lét eg halshogga. Kven er så denne som eg høyrer slikt om?» Og han ville gjerne møta han.

¹⁰Apostlane kom tilbake og fortalde Jesus om alt dei hadde gjort. Då tok han dei med så dei kunne vera åleine. Han drog bortover mot ein by som heiter Betsaida.

¹¹Men folk fekk vita det og følgde etter. Han tok imot dei og tala til dei om Guds rike, og han lækte dei som trong å bli friske.

¹²Då det leid mot kveld, kom dei tolv til han og sa: «Send folket frå deg, så dei kan gå bort i landsbyane og gardane her omkring. Der kan dei finna hus og få seg noko å eta. For her er vi på ein aud stad.»

¹³«De skal gje dei mat!» svara Jesus. «Vi har ikkje meir enn fem brød og to fiskar», sa dei, «om vi då ikkje sjølve skal gå og kjøpa mat til alt dette folket.»

¹⁴Det var samla om lag fem tusen menn. Då sa han til læresveinane: «Lat dei setja seg i flokkar på femti.»

¹⁵Dei gjorde som han sa, og lét alle setja seg.

¹⁶Så tok han dei fem brøda og dei to fiskane, såg opp mot himmelen og velsigna dei. Og han braut dei og gav dei til læresveinane, så dei skulle by rundt til folket.

¹⁷Og alle åt og vart mette. Etterpå samla dei opp dei stykka som var til overs, og det vart tolv korger.

¹⁸Ein gong var han åleine og bad, og berre læresveinane var med han. Då spurde han dei: «Kven seier folk at eg er?»

¹⁹«Døyparen Johannes», svara dei, «men somme seier Elia og andre at ein av dei gamle profetane har stått opp att.»

²⁰[84] «Og de», spurde han, «kven seier de at eg er?» Då svara Peter: «Du er Guds Messias.»

²¹Men det forbaud han dei strengt å seia til nokon.

²²[85] Og han sa: «Menneskesonen skal lida mykje og bli vraka av dei eldste, overprestane og dei skriftlærde. Han skal bli slegen i hel, og tredje dagen skal han reisast opp.»

²³[86] Så sa han til dei alle: «Vil nokon følgja etter meg, må han seia nei til seg sjølv og dag for dag ta krossen sin opp og følgja meg.

²⁴For den som vil berga livet sitt, skal mista det. Men den som mistar livet sitt for mi skuld, skal berga det.

²⁵Kva gagnar det eit menneske om det vinn heile verda, men mistar seg sjølv og går til grunne?

²⁶For den som skjemmest ved meg og orda mine, han skal Menneskesonen skjemmast ved når han kjem i sin og sin Fars og dei heilage englars herlegdom.

²⁷Sanneleg, eg seier dykk: Somme av dei som står her, skal ikkje smaka døden før dei får sjå Guds rike.»

²⁸Om lag åtte dagar etter at han hadde sagt dette, tok han med seg Peter, Johannes og Jakob og gjekk opp i fjellet for å be.

²⁹Og medan han bad, vart andletet hans som omskapt, og kleda vart skinande kvite.

³⁰Med eitt stod to menn og snakka med han; det var Moses og Elia.

³¹Dei synte seg i herlegdom og tala om den utgangen livet hans skulle få, om det han skulle fullføra i Jerusalem.

³²Peter og dei andre hadde falle i djup søvn. No vakna dei og fekk sjå herlegdomen hans og dei to mennene som stod der saman med han.

³³Då mennene skulle skiljast med han, sa Peter til Jesus: «Meister, det er godt at vi er her. Lat oss byggja tre hytter, ei til deg, ei til Moses og ei til Elia» — han visste ikkje sjølv kva han sa.

³⁴Og medan han tala, kom det ei sky og la skugge over dei, og då dei kom inn i skya, vart dei gripne av redsle.

³⁵Frå skya kom det ei røyst: «Dette er Son min, den utvalde. Høyr han!»

³⁶Og då røysta lydde, var det ingen annan å sjå, berre Jesus. Læresveinane tagde med dette, og dei fortalde i dei dagane ikkje til nokon det dei hadde sett.

³⁷Dagen etter, då dei kom ned frå fjellet, vart han møtt av ei stor folkemengd.

³⁸Då ropa ein mann i flokken: «Meister, eg bed deg: Ta deg av son min, for han er einaste barnet eg har!

³⁹Brått kan ei ånd hogga tak i han; ho set i eit skrik og riv og slit i han så skummet står om munnen på han. Ho tek mest livet av han før ho endeleg slepper han.

⁴⁰Eg bad læresveinane dine driva henne ut, men dei greidde det ikkje.»

⁴¹Då sa Jesus: «Du vantruande og vrange slekt! Kor lenge skal eg vera hos dykk og halda ut med dykk? Kom hit med son din!»

⁴²Men før guten var komen fram til Jesus, kasta den vonde ånda han over ende og reiv og sleit i han. Då truga Jesus den ureine ånda og lækte guten og gav han tilbake til faren.

⁴³Og alle var fulle av undring over Guds veldige makt. Medan alle undra seg over alt det han gjorde, sa han til læresveinane:

⁴⁴«Høyr nøye etter det eg no seier: Menneskesonen skal gjevast over i hendene på menneske.»

⁴⁵Men dette skjøna dei ikkje. Det var løynt for dei, så dei ikkje fekk tak i det. Og dei våga ikkje å spørja han om det han hadde sagt.

⁴⁶Tanken kom opp mellom læresveinane om kven som kunne vera den største av dei.

⁴⁷Men Jesus skjøna kva dei tenkte i hjartet. Han tok eit lite barn, sette det attmed seg

⁴⁸og sa til dei: «Den som tek imot dette barnet i mitt namn, tek imot meg. Og den som tek imot meg, tek imot han som har sendt meg. For den som er minst av dykk alle, er stor.»

⁴⁹Då tok Johannes ordet: «Meister, vi såg ein som dreiv ut vonde ånder i ditt namn, og vi prøvde å hindra han, sidan han ikkje er i følgje med oss.»

⁵⁰Men Jesus svara: «De skal ikkje hindra han! Den som ikkje er imot dykk, er med dykk.»

⁵¹Då tida kom og Jesus skulle takast opp til himmelen, vende han andletet mot Jerusalem; det var dit han ville fara.

⁵²[87] Han sende bod føre seg, og dei drog av stad og kom til ein samaritansk landsby for å tinga hus til han.

⁵³Men der ville dei ikkje ta imot han, fordi han hadde vendt sine steg mot Jerusalem.

⁵⁴[88] Då læresveinane Jakob og Johannes fekk høyra dette, sa dei: «Herre, vil du at vi skal by eld fara ned frå himmelen og øyda dei?»

⁵⁵[89] Men han snudde seg og tala dei til rette. {{«De veit ikkje kva ånd de er av», sa han. «Menneskesonen er ikkje komen for å ta menneskeliv, men for å frelsa.»}}

⁵⁶Så gjekk dei til ein annan landsby.

⁵⁷Medan dei gjekk etter vegen, var det ein som sa til han: «Eg vil følgja deg kvar du så går.»

⁵⁸Jesus svara: «Revane har hi, og fuglane under himmelen har reir, men Menneskesonen har ikkje noko han kan kvila hovudet sitt på.»

⁵⁹Til ein annan sa han: «Følg meg!» Men mannen svara: «Herre, lat meg først få gå heim og gravleggja far min.»

⁶⁰Då sa Jesus til han: «Lat dei døde gravleggja sine døde, men gå du av stad og forkynn Guds rike.»

⁶¹Det var ein annan òg som sa: «Eg vil følgja deg, Herre, men lat meg først få seia farvel til dei der heime.»

⁶²Men Jesus svara: «Ingen som har lagt handa på plogen og så ser seg tilbake, er skikka for Guds rike.»