Read nynorsk 2011 5. Mosebok 11 Bible Online

5. Mosebok 11 - nynorsk 2011 bible

5. Mosebok 11

¹Difor skal du elska HERREN din Gud og alltid halda det han har fastsett, forskriftene, lovene og boda hans.

²Den dag i dag kjenner de HERREN dykkar Guds oppseding, som borna dykkar ikkje kjenner og ikkje har sett: hans velde, hans sterke hand og hans utstrekte arm,

³ dei teikn og gjerningar han gjorde i Egypt mot farao, kongen i Egypt, og heile landet hans,

⁴ det han gjorde med hæren til egyptarane, med hestane og vognene deira då han lét vatnet i Sivsjøen velta innover dei medan dei forfølgde dykk, så han gjorde ende på dei for alltid,

⁵det han gjorde for dykk i ørkenen, heilt til de kom til denne staden,

⁶ og det han gjorde med Datan og Abiram, sønene til Eliab, son til Ruben, den gongen jorda opna gapet og slukte dei og familiane deira, telta deira og kvar levande skapning i følgjet deira, midt iblant alle israelittane.

⁷Ja, med eigne auge har de sett alle dei storverka som HERREN har gjort.

⁸Hald difor alle dei boda eg gjev deg i dag, slik at de kan bli sterke og kan koma og ta det landet de er på veg til og skal leggja under dykk.

⁹Då skal de få leva lenge i det landet som HERREN med eid lova fedrane dykkar at han ville gje til dei og etterkomarane deira, eit land som fløymer med mjølk og honning.

¹⁰[18] For det landet du no går inn i og skal leggja under deg, liknar ikkje Egypt, det landet de drog ifrå. Der måtte du, som i ein grønsakhage, bruka føtene når du skulle så frøet ditt og vatna.

¹¹Men landet de no er på veg til for å leggja under dykk, er eit land med fjell og dalar. Det får vatn å drikka av regnet frå himmelen.

¹²Det er eit land som HERREN din Gud har omsut for. Alltid kviler HERREN din Guds auge på det, frå året byrjar til det endar.

¹³Om de lyder dei boda som eg gjev dykk i dag, og elskar HERREN dykkar Gud og tener han av heile dykkar hjarte og heile dykkar sjel,

¹⁴vil eg la landet få regn i rett tid, haustregn og vårregn, så du kan hausta inn korn, ny vin og fin olje.

¹⁵Gras skal eg la veksa på marka for buskapen din, og du skal få eta deg mett.

¹⁶Men akta dykk så ikkje hjartet blir ført på avvegar, så de vender dykk bort og dyrkar andre gudar og tilbed dei.

¹⁷For då logar HERRENS harme opp mot dykk. Han stengjer himmelen så det ikkje fell regn og jorda ikkje gjev grøde. Og de går snart til grunne i det gode landet som HERREN gjev dykk.

¹⁸Så ber då desse orda mine i hjarte og sinn. Bind dei om handa som eit teikn og ber dei på panna som eit merke.

¹⁹Lær dei vidare til borna dykkar, snakk om dei når du sit heime og når du går på vegen, når du legg deg og når du står opp.

²⁰Skriv dei på dørstolpane i huset ditt og på portane dine.

²¹Då skal de og etterkomarane dykkar få leva lenge på den jorda som HERREN med eid lova å gje fedrane dykkar, like lenge som himmelen kvelver seg over jorda.

²²For dersom de legg vinn på å halda alle desse boda som eg gjev dykk, og lever etter dei så de elskar HERREN dykkar Gud, alltid går på hans vegar og held fast ved han,

²³då skal HERREN driva ut alle desse folkeslaga framfor dykk, og de skal jaga bort folkeslag som er større og sterkare enn de.

²⁴[19] Kvar stad de set foten på, skal høyra dykk til. Området dykkar skal strekkja seg frå ørkenen og Libanon, frå den store elva Eufrat, til havet i vest.

²⁵Ingen skal kunna stå seg mot dykk. HERREN dykkar Gud skal setja skrekk og redsle for dykk i alt land de set foten på, slik som han har lova.

²⁶Sjå, i dag legg eg fram for dykk velsigning og forbanning:

²⁷velsigning så sant de lyder boda frå HERREN dykkar Gud, som eg gjev dykk i dag;

²⁸forbanning dersom de ikkje lyder boda frå HERREN dykkar Gud, men tek av frå den vegen eg i dag byd dykk å gå, og følgjer andre gudar som de ikkje kjenner.

²⁹Når HERREN din Gud har ført deg inn i det landet du no er på veg til og skal leggja under deg, så skal du lysa velsigning over Garisim-fjellet og forbanning over Ebal-fjellet.

³⁰[20] Som alle veit, ligg desse fjella på den andre sida av Jordan, der sola går ned, i landet til kanaanearane som bur på Araba-sletta, rett imot Gilgal, ved More-eika.

³¹No skal de gå over Jordan for å gå inn og ta det landet som HERREN dykkar Gud vil gje dykk. Når de har teke det og busett dykk der,

³²følg då trufast alle dei forskrifter og lover som eg legg fram for dykk i dag.