Read nynorsk 2011 5. Mosebok 13 Bible Online

5. Mosebok 13 - nynorsk 2011 bible

5. Mosebok 13

¹Det kan henda at det står fram ein profet eller drøymar hos deg og lovar deg eit teikn eller under.

²Så hender teiknet eller underet, slik han har sagt, men samstundes seier han: «Kom, lat oss følgja andre gudar» — som du ikkje kjenner — «og dyrka dei».

³Då skal du ikkje høyra på det som ein slik profet eller drøymar seier. For HERREN dykkar Gud vil berre prøva dykk og sjå om de elskar HERREN dykkar Gud av heile dykkar hjarte og av heile dykkar sjel.

⁴HERREN dykkar Gud skal de følgja, og han skal de frykta. Hans bod skal de halda, og hans røyst skal de lyda. Han skal de dyrka, og han skal de halda fast ved.

⁵Men denne profeten eller drøymaren skal straffast med døden fordi han lokka deg bort frå den vegen som HERREN din Gud baud deg å gå. På den måten forførte han dykk til å gjera opprør mot HERREN dykkar Gud, han som førte dykk ut frå Egypt og fria deg ut frå slavehuset. Såleis skal du rydda ut det vonde hos deg.

⁶Det kan henda at bror din, son til mor di, eller son din eller dotter di, eller kona di som du tek i famn, eller den kjæraste venen din lokkar deg i løynd og seier: «Lat oss gå av og dyrka andre gudar» — gudar som korkje du eller fedrane dine har kjent,

⁷gudar som folka omkring dykk dyrkar, anten nær ved eller langt borte, frå den eine enden av jorda til den andre.

⁸Då skal du ikkje gje etter og ikkje høyra på han. Du skal ikkje visa han medkjensle og ikkje spara han eller dekkja han.

⁹Nei, du skal ta livet av han. Lat handa di vera den første som blir lyft mot han for å drepa, og sidan skal heile folket lyfta handa mot han.

¹⁰Du skal steina han i hel fordi han prøvde å lokka deg bort frå HERREN din Gud, som førte deg ut frå Egypt, frå slavehuset.

¹¹Og heile Israel skal høyra om det og bli gripne av redsle, så dei aldri meir gjer ei slik ugjerning blant folket ditt.

¹²Det kan henda du høyrer nokon seia om ein av dei byane HERREN din Gud gjev deg å bu i,

¹³at det har stige fram svikefulle menneske hos deg og lokka dei som bur i byen og sagt: «Lat oss gå bort og dyrka andre gudar» — gudar som de ikkje kjenner.

¹⁴Då skal du saumfara saka nøye, granska og spørja deg føre. Om det er sant og det blir stadfest at dette avskyelege er gjort hos deg,

¹⁵[24] skal du hogga ned folket i denne byen med sverd. Både byen og alt som er i han, skal du slå med bann og øydeleggja. Også buskapen skal du hogga ned med sverd.

¹⁶Alt hærfanget som er teke, skal du samla midt på torget. Og du skal brenna byen og hærfanget som eit heiloffer til HERREN din Gud. Sidan skal byen liggja som ein ruinhaug og aldri byggjast opp att.

¹⁷Ikkje noko av det som er bannlyst, skal handa di festa seg ved. Då vil HERREN venda seg bort frå sin brennande harme og gje deg miskunn. Han vil visa deg miskunn og gjera deg talrik, slik som han med eid lova fedrane dine.

¹⁸Du skal høyra på røysta til HERREN din Gud og halda alle boda hans som eg gjev deg i dag, og gjera det som rett er i HERREN din Guds auge.