Read nynorsk 2011 5. Mosebok 20 Bible Online

5. Mosebok 20 - nynorsk 2011 bible

5. Mosebok 20

¹Når du dreg ut i krig mot fiendane dine og får auge på hestar og vogner, ein hær som er større enn din, så ver ikkje redd dei. For HERREN din Gud er med deg, han som førte deg opp frå Egypt.

²Når de stiller opp til strid, skal presten stiga fram og tala til krigsfolket.

³Han skal seia til dei: «Høyr, Israel! I dag går de til strid mot fiendane dykkar. Mist ikkje motet! Frykt ikkje, skjelv ikkje av redsle, lat dykk ikkje skremma av dei!

⁴For det er HERREN dykkar Gud som går med dykk. Han vil strida for dykk mot fiendane og gje dykk siger.»

⁵Så skal tilsynsmennene tala til krigsfolket og seia: «Er det nokon som har bygd seg eit nytt hus, men ikkje vigsla det enno, kan han dra heim att, så ikkje ein annan skal vigsla huset om han fell i krigen.

⁶Er det nokon som har planta ei vinmark, men enno ikkje teke henne i bruk, kan han dra heim att, så ikkje ein annan skal ta vinmarka i bruk om han fell i krigen.

⁷Og er det nokon som har bunde seg til ei kvinne, men enno ikkje har teke henne til ekte, kan han dra heim att, så ikkje ein annan skal ta henne til ekte om han fell i krigen.»

⁸Tilsynsmennene skal halda fram og seia til krigsfolket: «Er det nokon som er redd og motlaus, kan han dra heim att, så ikkje hjartet til våpenbrørne hans òg skal smelta bort.»

⁹Når så tilsynsmennene er ferdige med å tala til krigsfolket, skal dei velja ut hærførarar.

¹⁰Når du dreg fram mot ein by og vil gå til åtak på han, skal du først by han fred.

¹¹Dersom byen tek imot fredstilbodet og opnar portane for deg, skal alt folket som finst i byen, vera slavar og tena deg.

¹²Men dersom dei ikkje vil slutta fred, men føra krig med deg, skal du kringsetja byen.

¹³HERREN din Gud vil overgje han i dine hender, og du skal hogga ned alle mennene der med sverd.

¹⁴Men kvinnene, småborna og husdyra og alt anna i byen kan du ta med deg som hærfang. Du kan ta for deg av dette hærfanget frå fiendane dine som HERREN din Gud gjev deg.

¹⁵Såleis skal du fara fram i alle byane som ligg langt borte frå deg og ikkje høyrer folkeslaga her til.

¹⁶Men i dei byane som høyrer desse folka til, og som HERREN din Gud gjev deg til eigedom, der skal du ikkje spara ein einaste levande skapning.

¹⁷[35] Du skal slå dei alle med bann og utrydda dei, både hetittane, amorittane, kanaanearane, perisittane, hevittane og jebusittane, slik HERREN din Gud har bode deg.

¹⁸Elles kunne dei læra dykk å ta etter alt det avskyelege dei sjølve har gjort for gudane sine, slik at de syndar mot HERREN dykkar Gud.

¹⁹Når du krigar mot ein by og må kringsetja han i lang tid før du kan ta han, skal du ikkje bruka øks på trea der og øydeleggja dei. Du kan eta av dei, men du må ikkje hogga dei ned. Er trea på marka menneske, så du må kringsetja dei òg?

²⁰Berre når du er sikker på at trea ikkje ber etande frukt, kan du øydeleggja dei. Du kan hogga dei ned og bruka dei til å byggja stillingar for å kringsetja den byen som er i krig med deg, heilt til han fell.