Read nynorsk 2011 5. Mosebok 28 Bible Online

5. Mosebok 28 - nynorsk 2011 bible

5. Mosebok 28

¹Dersom du no vil lyda HERREN din Guds røyst og trufast følgja alle boda hans som eg gjev deg i dag, skal HERREN din Gud setja deg høgt over alle folkeslag på jorda.

²Og alle desse velsigningane skal koma over deg og nå deg, så sant du er lydig mot HERREN din Gud:

³Velsigna er du i byen og velsigna ute på marka!

⁴Velsigna er frukta av ditt morsliv, frukta av ditt åkerland og frukta av din buskap, det som blir fødd av storfe, og det som kjem til av småfe!

⁵Velsigna er di korg og ditt bakstetrau!

⁶ Velsigna er du når du går inn, og velsigna er du når du går ut!

⁷Når fiendane går på deg, skal HERREN gjera det slik at du vinn over dei. Kjem dei mot deg på éin veg, skal dei rømma for deg på sju.

⁸ HERREN skal gje påbod om velsigning over deg og di matbu og over alt ditt arbeid. Ja, HERREN din Gud skal velsigna deg i det landet som han gjev deg.

⁹Dersom du held boda frå HERREN din Gud og går på hans vegar, vil HERREN gjera deg til sitt heilage folk, slik han med eid har lova deg.

¹⁰[49] Då skal alle folk på jorda sjå at HERRENS namn er ropa ut over deg, og dei skal frykta deg.

¹¹HERREN skal gje deg rikeleg av det som godt er, av frukt av ditt morsliv og frukt av din buskap og frukt av ditt åkerland, på den jorda HERREN med eid lova fedrane dine å gje deg.

¹²HERREN skal opna sitt rike forrådskammer, himmelen, for deg. Han skal la landet få regn i rett tid og velsigna alt dine hender gjer. Du skal låna ut til mange folkeslag, men sjølv treng du ikkje låna.

¹³[50]HERREN skal gjera deg til hovud og ikkje til hale. Alltid skal du koma høgare, aldri lågare, så sant du lyder boda til HERREN din Gud som eg gjev deg i dag, så du held dei og gjer etter dei.

¹⁴Du må ikkje vika av frå noko av dei boda eg gjev deg i dag, korkje til høgre eller venstre, ikkje følgja andre gudar og ikkje dyrka dei.

¹⁵Men om du ikkje vil lyda HERREN din Guds røyst, ikkje held alle boda og forskriftene hans som eg gjev deg i dag, og ikkje gjer etter dei, då skal alle desse forbanningane koma over deg og nå deg:

¹⁶Forbanna er du i byen og forbanna ute på marka!

¹⁷Forbanna er di korg og ditt bakstetrau!

¹⁸Forbanna er frukta av ditt morsliv og frukta av ditt åkerland, det som blir fødd av storfe, og det som kjem til av småfe!

¹⁹Forbanna er du når du går inn, og forbanna når du går ut!

²⁰ HERREN skal senda forbanning, forvirring og plage over deg og over alt det hendene dine har gjort, til du blir utrydda og brått går til grunne, fordi du gjorde det vonde og gjekk bort frå meg.

²¹ HERREN skal la pesten bli hangande ved deg til han gjer ende på deg i det landet du no går inn i og skal leggja under deg.

²²[51]HERREN skal slå deg med tæring og verk, kulsing og feber, med tørke og kornsot og svartrust, og det skal forfølgja deg til du går til grunne.

²³Himmelen over hovudet ditt skal bli til bronse og jorda under deg til jern.

²⁴HERREN skal omskapa regnet over landet ditt til sand og støv. Frå himmelen skal det falla ned over deg til du blir utrydda.

²⁵ HERREN skal gjera det slik at fiendane dine vinn over deg. Dreg du ut mot dei på éin veg, skal du rømma for dei på sju. Du skal bli til skrekk for alle kongerike på jorda.

²⁶Lika av dykk skal bli til føde for alle fuglane under himmelen og for dyra på marka, og ingen skal jaga dei.

²⁷HERREN skal slå deg med verkebyllar som i Egypt, med svullar, skabb og skurv som ikkje lèt seg lækja.

²⁸HERREN skal slå deg med galskap, blindskap og vilske.

²⁹Midt på dagen skal du trivla deg fram som den blinde trivlar i mørkret. Du skal ikkje lukkast på din veg. Du blir undertrykt og utplyndra dag etter dag, og det er ingen som hjelper.

³⁰Bind du deg til ei kvinne, skal ein annan mann valdta henne. Byggjer du deg hus, får du ikkje bu i det. Plantar du ei vinmark, får du ikkje ta henne i bruk.

³¹Oksen din skal slaktast medan du ser på, og du får ikkje eta kjøtet. Eselet ditt skal røvast beint for auga dine og kjem aldri tilbake til deg. Småfeet ditt skal fiendane få, og ingen kjem deg til hjelp.

³²Sønene og døtrene dine skal gjevast til eit anna folk. Du skal sjå etter dei og lengta heile tida, men fåfengt, for du er maktlaus.

³³Eit folk du ikkje kjenner, skal eta opp grøda frå jorda di og det du har vunne med alt ditt strev. Du blir berre undertrykt og trakka på, dag etter dag.

³⁴Du kjem til å mista vitet av det synet du får sjå.

³⁵HERREN skal slå deg på kne og på lår med vonde verkebyllar som ikkje kan lækjast; dei skal breia seg frå hovud til hæl.

³⁶HERREN skal føra deg og den kongen du set over deg, bort til eit folkeslag som korkje du eller fedrane dine har kjent, og der skal du dyrka andre gudar, stokk og stein.

³⁷Der skal du bli eit skremsel, eit ordtak og eit spottord mellom alle dei folk som HERREN fører deg bort til.

³⁸Mykje korn skal du så i åkeren, men lite skal du hausta, for grashoppene et det opp.

³⁹Vinmarker skal du planta og dyrka, men vin får du verken drikka eller lagra, for makken et dei opp.

⁴⁰Oliventre skal du ha overalt i landet ditt, men du får ikkje salva deg med olje, for olivenfrukta fell ned.

⁴¹Søner og døtrer skal du få, men dei skal ikkje høyra deg til, for dei må gå i fangenskap.

⁴²Alle trea dine og grøda på jorda di skal grashoppene ta.

⁴³Innflyttaren som bur hos deg, skal koma høgare og høgare over deg, men du skal koma lågare og lågare.

⁴⁴Han skal låna ut til deg, men du har ingen ting å låna han. Han skal bli hovud og du hale.

⁴⁵Alle desse forbanningane skal koma over deg. Dei skal forfølgja deg og nå deg att til du blir utrydda, fordi du ikkje lydde HERREN din Gud og ikkje heldt dei boda og forskriftene som han har gjeve deg.

⁴⁶Dei skal vera teikn og varsel for deg og etterkomarane dine til alle tider.

⁴⁷Fordi du ikkje tente HERREN din Gud av eit godt hjarte, i glede over all di overflod,

⁴⁸må du tena fiendane som HERREN sender mot deg, og vera svolten, tørst og naken og mangla alt. Han skal leggja eit jernåk på nakken din, heilt til han har rydda deg ut.

⁴⁹HERREN skal senda over deg eit folkeslag frå det fjerne, frå enden av jorda, som ei stupande ørn, eit folk med eit språk som du ikkje forstår,

⁵⁰eit folkeslag med harde andlet, som ikkje tek omsyn til dei gamle og ikkje er nådig mot dei unge.

⁵¹Dei skal eta opp frukta av buskapen din og frukta av åkerlandet, til du blir utrydda. Dei lét verken korn, ny vin eller fin olje vera att til deg, verken det som blir fødd av storfe, eller det som kjem til av småfe. Dei held fram til dei har utrydda deg.

⁵²Dei skal omringa deg i alle byane dine, til dei styrtar ned, dei høge festningsmurane som du set di lit til overalt i landet ditt. Dei skal omringa deg i alle byane i heile landet som HERREN din Gud gjev deg.

⁵³Og i trengsla og nauda som fienden fører over deg, skal du eta dine eigne born, kjøtet av sønene og døtrene som HERREN din Gud har gjeve deg.

⁵⁴Den finaste og mest bortskjemde mannen hos deg vil då vera så vond mot bror sin og kona si og mot dei borna han enno har att,

⁵⁵at han ikkje unner dei ein kjøtbit av borna sine som han et. For han har ikkje anna att i den trengsle og naud som fienden lét koma over deg i alle byane dine.

⁵⁶Og den finaste og mest bortskjemde kvinna, som aldri har prøvd å setja foten på jorda, så fin og bortskjemd som ho er, skal ikkje unna sin eigen mann, son sin eller dotter si

⁵⁷etterburden som kjem ut mellom beina på henne, eller borna ho har fødd. Fordi ho manglar alt, skal ho eta det i løynd, i den trengsle og naud som fienden lét koma over deg i byane dine.

⁵⁸Dersom du ikkje trufast følgjer kvart ord i denne lova som er skriven i denne boka, og ikkje fryktar dette ærerike og skremmande namnet, HERREN din Gud,

⁵⁹då skal HERREN senda ufattelege plager over deg og etterkomarane dine, veldige plager og vonde sjukdomar som ingen ende vil ta.

⁶⁰Han skal igjen senda over deg alle farsottene frå Egypt som du gruar deg for, og dei skal bli hangande ved deg.

⁶¹Også alle sjukdomar og plager som ikkje er nemnde i denne lovboka, skal HERREN senda over deg, heilt til du blir utrydda.

⁶²Berre ein liten flokk skal bli att av dykk som før var talrike som stjernene på himmelen. For du lydde ikkje HERREN din Gud.

⁶³Liksom HERREN før gledde seg over å gjera vel mot dykk og gjera dykk talrike, skal han no gleda seg over å gjera ende på dykk og utrydda dykk. De skal rykkjast opp frå det landet du no går inn i og skal leggja under deg.

⁶⁴ HERREN skal spreia deg mellom alle folka frå den eine enden av jorda til den andre, og der skal du dyrka andre gudar som korkje du eller fedrane dine har kjent: stokk og stein.

⁶⁵Blant desse folkeslaga skal du aldri få ro og aldri finna kvile for din fot. Der skal HERREN gje deg eit uroleg hjarte, eit sviktande syn og eit motlaust sinn.

⁶⁶Livet ditt skal hanga i ein tråd. Dag og natt skal du leva i redsle og aldri vera trygg for livet ditt.

⁶⁷Om morgonen skal du seia: «Gjev det var kveld!» og om kvelden: «Gjev det var morgon!» Slik redsle skal du kjenna i hjartet ditt, og så fælsleg er det du får sjå.

⁶⁸HERREN skal føra deg på skip tilbake til Egypt, den vegen eg sa at du aldri meir skulle sjå. Der skal de by dykk fram til sal for fiendane dykkar som slavar og slavekvinner, men ingen vil kjøpa.