Read nynorsk 2011 5. Mosebok 3 Bible Online

5. Mosebok 3 - nynorsk 2011 bible

5. Mosebok 3

¹Så snudde vi og drog oppover vegen mot Basan. Kongen i Basan, Og, tok ut med heile hæren sin for å møta oss til strid ved Edre'i.

²Men HERREN sa til meg: «Ver ikkje redd han! Eg gjev både han og heile hæren hans og landet hans i dine hender. Du skal gjera med han som du gjorde med amorittkongen Sihon, som styrte i Hesjbon.»

³Så overgav HERREN vår Gud Og, kongen i Basan, og heile hæren hans i våre hender. Vi slo han og lét ingen overleva.

⁴Den gongen tok vi alle byane hans; det fanst ikkje nokon by som vi ikkje tok frå dei. Seksti byar var det, heile Argob-landet, riket til Og i Basan.

⁵Alle byane var festningsbyar med høge murar og med portar og bommar. Dessutan tok vi ei mengd med landsbyar.

⁶Vi slo byane med bann og utsletta dei, slik vi hadde gjort med Sihon, kongen i Hesjbon. Kvar einaste by utsletta vi, både menn, kvinner og born.

⁷Men all buskapen og hærfanget frå byane tok vi med oss.

⁸Såleis tok vi den gongen landet frå dei to amorittkongane austafor Jordan, frå Arnon-elva til Hermon-fjellet.

⁹Det er det fjellet som folket i Sidon kallar Sirjon og amorittane Senir.

¹⁰Vi tok alle byane på sletta, heile Gilead og heile Basan, med Salka og Edre'i, to byar i riket til Og i Basan.

¹¹[7] Kong Og i Basan var den einaste av refaittane som var att. Senga hans står enno hos ammonittane i Rabba. Ho er av jern og er ni alner lang og fire alner brei etter vanleg alnemål.

¹²Den gongen då vi tok dette landet, gav eg området frå Aroer ved Arnon-elva og halvparten av fjellandet i Gilead med byane der til rubenittane og gadittane.

¹³Resten av Gilead og heile Basan, riket til Og, gav eg til den eine halvparten av Manasse-stammen. Heile Argob-området og heile Basan vart kalla refaittlandet.

¹⁴Ja'ir, son til Manasse, tok heile Argob-området, heilt til grensa mot gesjurittane og maakatittane. Han gav Basan namn etter seg sjølv og kalla det Ja'irs teltbyar, og så heiter det den dag i dag.

¹⁵Eg gav Gilead til Makir.

¹⁶Til rubenittane og gadittane gav eg landet frå Gilead til Arnon-elva, slik at grensa gjekk midt i elva, og til Jabbok-elva, som er grense mot ammonittane;

¹⁷[8] dessutan Araba-sletta med Jordan som grense frå Kinneret-sjøen til Araba-sjøen, det vil seia Saltsjøen, ved foten av Pisga-liene i aust.

¹⁸Den gongen gav eg dykk dette påbodet: «HERREN dykkar Gud har gjeve dykk dette landet i eige. Krigarar! Væpna til strid skal de alle kryssa elva føre brørne dykkar, israelittane.

¹⁹Berre kvinner og born og husdyr — for eg veit at de har mykje fe — skal vera att i dei byane eg har gjeve dykk.

²⁰Først når HERREN har late brørne dykkar koma til ro liksom de, og dei òg har teke det landet som HERREN dykkar Gud vil gje dei på den andre sida av Jordan, kan de fara heim att, kvar til sin eigedom som eg har gjeve dykk.»

²¹Samstundes gav eg Josva dette påbodet: «Med eigne auge har du sett alt det som HERREN dykkar Gud har gjort med desse to kongane. Det same vil HERREN gjera med alle dei kongerika du skal gå igjennom.

²²Ver ikkje redd dei! For HERREN dykkar Gud vil sjølv slåst for dykk.»

²³Den gongen bad eg inderleg til HERREN:

²⁴«Herre vår GUD, du har byrja å syna ditt velde og di sterke hand for tenaren din. Kvar finst det ein gud i himmelen eller på jorda som kan gjera slike gjerningar og storverk som du?

²⁵Lat meg få koma over og sjå det gode landet på den andre sida av Jordan, dette fagre fjellandet og Libanon.»

²⁶Men for dykkar skuld vart HERREN harm på meg og ville ikkje høyra på meg. HERREN sa til meg: «Det er nok. Snakk ikkje meir til meg om dette!

²⁷Gå opp på toppen av Pisga-fjellet og vend auga dine mot vest og nord og sør og aust. Sjå deg omkring! For du skal aldri koma over Jordan.

²⁸Gjev oppdraget til Josva og gjer han modig og sterk! For det er han som skal føra dette folket over Jordan. Det landet du no ser, skal han gje dei til eige.»

²⁹Så slo vi oss til der i dalen, midt imot Bet-Peor.