Read nynorsk 2011 5. Mosebok 8 Bible Online

5. Mosebok 8 - nynorsk 2011 bible

5. Mosebok 8

¹Alle dei boda eg gjev deg i dag, skal de trufast følgja. Då skal de få leva og bli talrike og få koma inn og ta i eige det landet som HERREN med eid lova fedrane dykkar.

²Hugs den lange vegen som HERREN din Gud førte deg desse førti åra i ørkenen. Han ville audmjuka deg og prøva deg og sjå kva som budde i hjartet ditt, om du ville halda boda hans eller ikkje.

³Han audmjuka deg; han lét deg svelta og lét deg eta manna, ein mat som korkje du eller fedrane dine kjende til. Slik ville han visa deg at mennesket ikkje lever berre av brød; mennesket lever av kvart ord som kjem frå HERRENS munn.

⁴Kleda du hadde på deg, vart ikkje utslitne, og føtene dine hovna ikkje i desse førti åra.

⁵Og du skal vita i hjartet ditt at HERREN din Gud vil oppdra deg liksom ein mann oppdreg son sin.

⁶Då skal du òg halda boda til HERREN din Gud så du går på hans vegar og har age for han.

⁷For HERREN din Gud fører deg inn i eit godt land, eit land med rennande bekker, med kjelder og vassårer som spring fram i dalane og på fjellet,

⁸eit land med kveite og bygg, med vinstokkar, fikentre og granatepletre, eit land med olivenolje og honning,

⁹eit land der du ikkje skal eta brødet ditt i fattigdom og ikkje mangla nokon ting, eit land der det er jern i steinane og du kan bryta kopar ut av fjellet.

¹⁰Der skal du eta og bli mett og velsigna HERREN din Gud for det gode landet han har gjeve deg.

¹¹Ta deg i vare så du ikkje gløymer HERREN din Gud og lèt vera å halda boda, lovene og forskriftene hans som eg i dag byd deg å halda.

¹²Når du et og blir mett, når du byggjer deg fine hus og får bu i dei,

¹³når storfeet og småfeet ditt aukar, når du får mengder av gull og sølv og eigedomane dine veks,

¹⁴ta deg då i vare så du ikkje blir hovmodig og gløymer HERREN din Gud som førte deg ut frå Egypt, ut frå slavehuset.

¹⁵Han førte deg gjennom den store, uhyggjelege ørkenen med giftslangar og skorpionar, eit uttørka land utan vatn. Han lét vatnet strøyma for deg frå harde fjellet,

¹⁶han lét deg eta manna i ørkenen, ein mat som fedrane dine aldri hadde høyrt om. Alt dette gjorde han fordi han ville audmjuka deg og prøva deg og så gjera vel mot deg til slutt.

¹⁷Du kan seia i hjartet ditt: «Det er mi eiga kraft og mi sterke hand som har skaffa meg denne rikdomen.»

¹⁸Men hugs HERREN din Gud, for det er han som gjev deg kraft til å vinna rikdom. Slik vil han stå ved den pakta som han gjorde med fedrane dine, slik han òg gjer det i dag.

¹⁹Men om du gløymer HERREN din Gud og følgjer andre gudar, dyrkar dei og tilbed dei, då skal de gå til grunne. Det er vitnemålet mitt til dykk i dag.

²⁰Liksom folkeslaga HERREN utryddar for dykk, skal de sjølve gå til grunne fordi de ikkje ville høyra på røysta til HERREN dykkar Gud.