Read nynorsk 2011 Johannes 1 Bible Online

Johannes 1 - nynorsk 2011 bible

Johannes 1

¹ [1] I opphavet var Ordet, Ordet var hos Gud, og Ordet var Gud.

² Han var i opphavet hos Gud.

³ Alt vart til ved han, og utan han vart ikkje noko til. Det som vart til

⁴i han, var liv, og livet var lyset for menneska.

⁵ Lyset skin i mørkret, og mørkret har ikkje overvunne det.

⁶[2] Eit menneske stod fram, utsendt av Gud; namnet hans var Johannes.

⁷Han kom for å vitna. Han skulle vitna om lyset, så alle kunne koma til tru ved han.

⁸Han sjølv var ikkje lyset, men han skulle vitna om lyset.

⁹ Det sanne lyset, som lyser for kvart menneske, kom no til verda.

¹⁰Han var i verda, og verda vart til ved han, og verda kjende han ikkje.

¹¹Han kom til sitt eige, og hans eigne tok ikkje imot han.

¹² Men alle som tok imot han, dei gav han rett til å bli Guds born, dei som trur på namnet hans.

¹³ Dei er ikkje fødde av kjøt og blod, ikkje av menneskevilje og ikkje av manns vilje, men av Gud.

¹⁴ [3] Og Ordet vart menneske og tok bustad mellom oss. Og vi såg hans herlegdom, ein herlegdom som den einborne Sonen har frå Far sin, full av nåde og sanning.

¹⁵Johannes vitnar om han og ropar ut: «Det var om han eg sa: Han som kjem etter meg, er komen før meg, for han var til før meg.»

¹⁶ Av hans overflod har vi alle fått, nåde over nåde.

¹⁷For lova vart gjeven ved Moses, nåden og sanninga kom ved Jesus Kristus.

¹⁸ [4] Ingen har nokon gong sett Gud, men den einborne, som er Gud, og som er i fanget til Far, han har synt oss kven han er.

¹⁹[5] Dette var vitneutsegna til Johannes då jødane sende prestar og levittar frå Jerusalem for å spørja han: «Kven er du?»

²⁰Då vedkjende han og nekta ikkje, men sa rett fram: «Eg er ikkje Messias.»

²¹[6] «Kven er du då?» spurde dei. «Er du Elia?» «Nei, det er eg ikkje», svara han. «Er du profeten?» «Nei», sa han.

²²«Sei oss då kven du er», sa dei, «så vi kan ha eit svar til dei som har sendt oss. Kva seier du om deg sjølv?»

²³Han sa: «Eg er ei røyst som ropar i øydemarka: Gjer Herrens veg bein, som profeten Jesaja har sagt.»

²⁴[7] Nokre av dei som var utsende, var farisearar,

²⁵og dei spurde: «Kvifor døyper du då, når du ikkje er Messias og heller ikkje Elia eller profeten?»

²⁶Johannes svara: «Eg døyper med vatn. Men midt imellom dykk står ein som de ikkje kjenner,

²⁷han som kjem etter meg, han som eg ikkje er verdig å løysa skoreima til.»

²⁸Dette hende i Betania på andre sida av Jordan, der Johannes var og døypte.

²⁹[8] Dagen etter ser han Jesus koma gåande mot seg og seier: «Sjå, Guds lam, som ber bort synda i verda!

³⁰Det var om han eg sa: Etter meg kjem det ein mann som er komen før meg, for han var til før meg.

³¹Eg visste ikkje kven han var, men for at han skal bli openberra for Israel, er eg komen og døyper med vatn.»

³²Og Johannes vitna og sa: «Eg såg Anden dala ned frå himmelen som ei due, og Anden vart verande over han.

³³Eg visste heller ikkje kven han var, men han som sende meg for å døypa med vatn, han sa til meg: Den du ser Anden dala ned over og bli verande over, han er den som døyper med Den heilage ande.

³⁴[9] Og eg har sett det, og eg har vitna: Han er Guds Son.»

³⁵Dagen etter stod igjen Johannes der med to av læresveinane sine.

³⁶Då Jesus kom gåande, såg Johannes på han og sa: «Sjå, Guds lam!»

³⁷Dei to læresveinane høyrde kva han sa og følgde etter Jesus.

³⁸Jesus snudde seg, og då han såg at dei følgde etter, sa han: «Kva leitar de etter?» Dei spurde: «Rabbi», — det tyder «lærar» — «kvar bur du?»

³⁹[10] «Kom og sjå», svara Jesus. Så gjekk dei med han og såg kvar han budde, og dei vart verande hos han den dagen. Det var omkring den tiande timen.

⁴⁰Andreas, bror til Simon Peter, var ein av dei to som hadde høyrt det Johannes sa, og hadde følgt etter Jesus.

⁴¹Han finn først bror sin, Simon, og seier til han: «Vi har møtt Messias» — Messias tyder «Han som er salva».

⁴²[11] Så tok han Simon med seg til Jesus. Jesus såg fast på han og sa: «Du er Simon, son til Johannes. Du skal heita Kefas» — det er det same som Peter.

⁴³Dagen etter ville Jesus dra til Galilea. Han fann då Filip og sa til han: «Følg meg!»

⁴⁴Filip var frå Betsaida, same byen som Andreas og Peter var frå.

⁴⁵Filip møtte Natanael og sa til han: «Vi har møtt han som Moses har skrive om i lova, og som profetane har skrive om: Det er Jesus frå Nasaret, son til Josef.»

⁴⁶«Kan det koma noko godt frå Nasaret?» spurde Natanael. «Kom og sjå!» svara Filip.

⁴⁷Jesus såg Natanael koma gåande mot seg og sa: «Sjå, der er ein ekte israelitt, ein som er utan svik.»

⁴⁸«Kvar kjenner du meg frå?» spurde Natanael. Jesus svara: «Eg såg deg då du var under fikentreet, før Filip ropa på deg.»

⁴⁹Då sa Natanael: «Rabbi, du er Guds Son, du er Israels konge.»

⁵⁰«Trur du fordi eg sa at eg såg deg under fikentreet?» spurde Jesus. «Du skal få sjå større ting enn det.»

⁵¹[12] Og han sa: «Sanneleg, sanneleg, eg seier dykk: De skal sjå himmelen opna og Guds englar gå opp og gå ned over Menneskesonen.»