Read nynorsk 2011 Johannes 13 Bible Online

Johannes 13 - nynorsk 2011 bible

Johannes 13

¹Det var like før påskehøgtida, og Jesus visste at timen hans var komen då han skulle fara bort frå denne verda og til Far sin. Han hadde elska sine eigne som var i verda, og han elska dei heilt til det siste.

²Då dei heldt måltid, hadde djevelen alt gjeve Judas, son til Simon Iskariot, den tanken i hjartet at han skulle svika han.

³Jesus visste at Far hadde gjeve alt i hans hender, og at han hadde gått ut frå Gud og gjekk til Gud.

⁴Då reiser han seg frå måltidet, legg av seg kappa og tek eit linklede og bind om seg.

⁵[69] Så slår han vatn i eit fat og tek til å vaska føtene til læresveinane og tørka dei med handkledet som han har om livet.

⁶Han kjem til Simon Peter, og Peter seier til han: «Herre, vaskar du mine føter?»

⁷Jesus svara: «Det eg gjer, forstår du ikkje no, men du skal skjøna det sidan.»

⁸«Aldri i æva om du skal vaska føtene mine», seier Peter. «Dersom eg ikkje vaskar deg, har du ingen del i meg», svara Jesus.

⁹Simon Peter seier til han: «Herre, ikkje berre føtene, men hendene og hovudet òg!»

¹⁰Men Jesus seier til han: «Den som er bada, er heilt rein og treng ikkje vaska anna enn føtene. Og de er reine — men ikkje alle.»

¹¹For han visste kven som skulle svika han. Difor sa han: «De er ikkje alle reine.»

¹²Då han hadde vaska føtene deira og teke på seg kappa, tok han plass ved bordet att. Så sa han til dei: «Skjønar de kva det er eg har gjort for dykk?

¹³De kallar meg meister og herre, og det med rette, for det er eg.

¹⁴Når no eg, herren og meisteren, har vaska føtene dykkar, då skyldar de òg å vaska føtene til kvarandre.

¹⁵Det er eit føredøme eg har gjeve dykk: Som eg har gjort mot dykk, skal de òg gjera.

¹⁶Sanneleg, sanneleg, eg seier dykk: Ein tenar er ikkje større enn herren sin, og ein utsending er ikkje større enn den som har sendt han.

¹⁷No veit de dette. Og sæle er de så sant de gjer etter det.

¹⁸[70] Eg talar ikkje om dykk alle, for eg veit kven eg har valt ut. Men dette ordet i Skrifta må oppfyllast: Den som et mitt brød, lyfte hælen mot meg.

¹⁹[71] Eg seier det til dykk no, før det hender, slik at de, når det hender, skal tru at Eg er.

²⁰Sanneleg, sanneleg, eg seier dykk: Den som tek imot ein eg sender, tek imot meg. Og den som tek imot meg, tek imot han som har sendt meg.»

²¹Då Jesus hadde sagt dette, vart han opprørt i sitt indre og sa rett ut: «Sanneleg, sanneleg, eg seier dykk: Ein av dykk kjem til å svika meg.»

²²Læresveinane såg på kvarandre; dei skjøna ikkje kven han meinte.

²³[72] Ein av dei, den læresveinen som Jesus hadde kjær, låg ved sida av Jesus ved bordet.

²⁴Simon Peter nikka til han for at han skulle spørja kven han meinte.

²⁵Han bøygde seg då nærare inntil Jesus og sa: «Herre, kven er det?»

²⁶Jesus svara: «Det er han som eg gjev den biten eg no dyppar.» Så dyppa han ein bit i fatet og gav han til Judas, son til Simon Iskariot.

²⁷Då Judas hadde fått biten, fór Satan i han. Jesus seier til han: «Gjer det snart, det du vil gjera.»

²⁸Men ingen av dei andre ved bordet skjøna kva han meinte med dette.

²⁹Sidan Judas hadde ansvar for pengekassa, tenkte somme at Jesus ville han skulle gå og kjøpa det dei trong til høgtida, eller at han skulle gje noko til dei fattige.

³⁰Med det same Judas hadde fått biten, gjekk han ut. Det var natt.

³¹Då han hadde gått, sa Jesus: «No lyste Guds herlegdom om Menneskesonen, og herlegdom lyste om Gud gjennom han.

³²Og har Gud vorte herleggjord gjennom han, så skal Gud sjølv herleggjera han. Ja, snart skal Guds herlegdom lysa om han!

³³Endå ei lita stund er eg hos dykk, borna mine. De kjem til å leita etter meg, men det eg sa til jødane, seier eg no til dykk òg: Dit eg går, kan ikkje de koma.

³⁴Eit nytt bod gjev eg dykk: De skal elska kvarandre. Som eg har elska dykk, skal de elska kvarandre.

³⁵På det skal alle skjøna at de er mine læresveinar: at de har kjærleik til kvarandre.»

³⁶Simon Peter seier til han: «Herre, kvar går du?» Jesus svara: «Dit eg går, kan du ikkje følgja meg no, men du skal følgja meg seinare.»

³⁷«Kvifor kan eg ikkje følgja deg no, Herre?» seier Peter, «eg vil gje livet mitt for deg.»

³⁸Jesus svara: «Du vil gje livet for meg? Sanneleg, sanneleg, eg seier deg: Hanen kjem ikkje til å gala før du har fornekta meg tre gonger.