Read nynorsk 2011 Johannes 14 Bible Online

Johannes 14 - nynorsk 2011 bible

Johannes 14

¹Lat ikkje hjartet dykkar uroast! Tru på Gud og tru på meg!

²I huset til Far min er det mange rom. Var det ikkje slik, hadde eg då sagt dykk at eg går og vil gjera klar ein stad til dykk?

³Og når eg har gått og gjort klar ein stad til dykk, kjem eg att og tek dykk til meg, så de skal vera der eg er.

⁴Og dit eg går, veit de vegen.»

⁵Tomas seier til han: «Herre, vi veit ikkje kvar du går; korleis kan vi då vita vegen?»

⁶Jesus seier: «Eg er vegen, sanninga og livet. Ingen kjem til Far utan gjennom meg.

⁷Har de kjent meg, skal de òg kjenna Far min. Frå no av kjenner de han og har sett han.»

⁸Filip seier til han: «Herre, syn oss Far, det er nok for oss.»

⁹Jesus svarar: «No har eg vore så lang ei tid saman med dykk, og du kjenner meg ikkje, Filip? Den som har sett meg, har sett Far. Korleis kan du då seia: ‘Syn oss Far’?

¹⁰Trur du ikkje at eg er i Far og Far i meg? Dei ord eg talar til dykk, har eg ikkje frå meg sjølv; det er Far som er i meg og gjer sine gjerningar.

¹¹Tru meg: Eg er i Far og Far i meg. Om ikkje for anna, så tru det for gjerningane skuld.

¹²Sanneleg, sanneleg, eg seier dykk: Den som trur på meg, skal gjera dei gjerningane som eg gjer, ja, større gjerningar enn dei, for eg går til Far.

¹³Og det de bed om i mitt namn, vil eg gjera, så Faderen skal bli herleggjord gjennom Sonen.

¹⁴Bed de meg om noko i mitt namn, så skal eg gjera det.

¹⁵Elskar de meg, så held de boda mine.

¹⁶[73] Då vil eg be Far min, og han skal gje dykk ein annan talsmann, og han skal vera hos dykk alltid:

¹⁷Sanningsanden, som verda ikkje kan ta imot. For verda ser han ikkje og kjenner han ikkje. Men de kjenner han, for han bur hos dykk og skal vera i dykk.

¹⁸Eg vil ikkje la dykk vera att som foreldrelause born. Eg kjem til dykk.

¹⁹Om ei lita stund ser ikkje verda meg lenger. Men de ser meg, for eg lever, og de skal leva.

²⁰Den dagen skal de skjøna at eg er i Far min, og at de er i meg og eg i dykk.

²¹Den som har boda mine, og som held dei, den er det som elskar meg. Og den som elskar meg, skal Far min elska. Ja, den som elskar meg, skal eg òg elska og openberra meg for.»

²²Judas — ikkje Judas Iskariot — seier til han: «Herre, korleis har det seg at du vil openberra deg for oss og ikkje for verda?»

²³Jesus svara: «Den som elskar meg, held fast på ordet mitt. Og den som elskar meg, skal Far min elska, og vi skal koma og ta bustad hos han.

²⁴Den som ikkje elskar meg, held ikkje fast på orda mine. Og ordet de høyrer, er ikkje frå meg, men frå Far, han som har sendt meg.

²⁵Dette har eg sagt dykk medan eg enno er hos dykk.

²⁶Men Talsmannen, Den heilage ande, som Far skal senda i mitt namn, han skal læra dykk alt og minna dykk på alt det eg har sagt dykk.

²⁷Fred etterlèt eg dykk, min fred gjev eg dykk. Eg gjev dykk ikkje fred på same måten som verda gjer det. Lat ikkje hjartet dykkar uroast, og ver ikkje motlause!

²⁸De høyrde at eg sa: Eg går bort, og eg kjem til dykk att. Elska de meg, så gledde de dykk over at eg går til Far, for Far er større enn eg.

²⁹No har eg sagt dykk dette før det hender, så de skal tru når det hender.

³⁰Heretter kjem eg ikkje til å tala mykje med dykk, for han som herskar over denne verda, kjem. Han har inga makt over meg.

³¹Men for at verda skal skjøna at eg elskar Far, og fordi Far har bode meg det, gjer eg som Far seier. Reis dykk, lat oss gå herifrå!