Read nynorsk 2011 Johannes 18 Bible Online

Johannes 18 - nynorsk 2011 bible

Johannes 18

¹Då Jesus hadde sagt dette, gjekk han ut saman med læresveinane sine og over til andre sida av Kedron-bekken. Der var det ein hage, og den gjekk dei inn i.

²Men Judas, svikaren, kjende òg den staden, for Jesus og læresveinane hadde ofte kome saman der.

³[78] Judas hadde fått med seg vaktstyrken og nokre menn frå overprestane og farisearane, og no kom dei dit med faklar og lamper og våpen.

⁴Jesus visste om alt det som venta han, og gjekk fram og spurde dei: «Kven leitar de etter?»

⁵[79] «Jesus frå Nasaret», svara dei. «Det er eg», seier Jesus. Judas, svikaren, var saman med dei, han òg.

⁶Då Jesus sa: «Det er eg», tumla dei bakover og fall til jorda.

⁷På nytt spurde han: «Kven leitar de etter?» «Jesus frå Nasaret», svara dei.

⁸«Eg har sagt dykk at det er eg», sa Jesus. «Er det meg de leitar etter, så lat desse andre gå!»

⁹Slik skulle det oppfyllast, det ordet han hadde sagt: «Av dei du gav meg, har eg ikkje mista ein einaste.»

¹⁰[80] Simon Peter hadde eit sverd, og det drog han og hogg etter tenaren til øvstepresten og sneidde av han høgre øyret. Tenaren heitte Malkos.

¹¹Men Jesus sa til Peter: «Stikk sverdet i slira! Lyt eg ikkje drikka det begeret som Far har gjeve meg?»

¹²[81] Vaktstyrken, kommandanten og vaktmennene til jødane greip no Jesus og batt han.

¹³Først førte dei han til Annas, for han var svigerfar til Kaifas, som var øvsteprest det året.

¹⁴[82] Det var Kaifas som hadde gjeve jødane det rådet at det var best om eitt menneske døydde for folket.

¹⁵Simon Peter og ein annan læresvein følgde etter Jesus. Denne læresveinen var kjend med øvstepresten, og han kom inn på gardsplassen til øvstepresten saman med Jesus.

¹⁶Men Peter vart ståande utanfor ved porten. Den læresveinen som var kjend med øvstepresten, gjekk då ut og tala med tenestejenta som vakta porten, og fekk Peter med seg inn.

¹⁷I det same seier ho til Peter: «Er ikkje du òg ein av læresveinane til denne mannen?» «Nei», svara han, «det er eg ikkje.»

¹⁸Det var kaldt, så tenarane og vaktmennene hadde tent eit bål og stod og vermde seg ved glørne. Peter vart òg ståande der saman med dei og vermde seg.

¹⁹Øvstepresten spurde no Jesus ut om læresveinane hans og om læra hans.

²⁰«Eg har tala ope for heile verda», svara Jesus. «Eg har alltid undervist i synagogar og i tempelet, der alle jødar kjem saman; eg har aldri tala i løynd.

²¹Men kvifor spør du meg? Spør heller dei som har høyrt meg, kva eg har tala til dei om. Dei veit kva eg har sagt.»

²²Ein av vaktmennene som stod der, slo då Jesus i andletet og sa: «Er det slik du svarar øvstepresten?»

²³Jesus sa til han: «Sa eg noko urett, så vis at det var urett! Men var det rett, kvifor slår du meg då?»

²⁴Så sende Annas han bunden til øvstepresten Kaifas.

²⁵Imedan stod Simon Peter og vermde seg. Då sa dei til han: «Er ikkje du òg ein av læresveinane hans?» Men han nekta og sa: «Nei, det er eg ikkje.»

²⁶Ein av tenarane til øvstepresten, ein slektning av han som Peter hadde hogge øyret av, seier: «Såg eg deg ikkje i hagen saman med han?»

²⁷Men Peter nekta på nytt. Og med det same gol hanen.

²⁸[83] Frå Kaifas førte dei Jesus til borga der landshovdingen heldt til. Det var tidleg om morgonen. Sjølve gjekk dei ikkje inn i borga; dei ville ikkje gjera seg ureine, for då kunne dei ikkje eta påskemåltidet.

²⁹Pilatus gjekk då ut til dei og sa: «Kva skuldingar har de mot dette mennesket?»

³⁰Dei svara: «Var han ikkje ein forbrytar, hadde vi ikkje gjeve han over til deg.»

³¹[84] «Ta han de», sa Pilatus, «og døm han etter dykkar eiga lov!» Men jødane svara: «Vi har ikkje rett til å ta livet av nokon.»

³²Slik skulle det oppfyllast, det ordet Jesus hadde sagt då han lét dei få vita kva slag død han skulle lida.

³³[85] Pilatus gjekk då på nytt inn i borga. Han kalla Jesus til seg og sa: «Er du kongen over jødane?»

³⁴Jesus svara: «Seier du dette av deg sjølv, eller har andre sagt dette om meg?»

³⁵«Er vel eg jøde?» sa Pilatus. «Ditt eige folk og overprestane har gjeve deg over til meg. Kva har du gjort?»

³⁶[86] Då sa Jesus: «Mi kongsmakt er ikkje av denne verda. Var mi kongsmakt av denne verda, hadde mennene mine stridd for meg, så eg ikkje skulle bli overgjeven i hendene på jødane. Men mi kongsmakt er ikkje av denne verda.»

³⁷«Du er altså konge?» sa Pilatus. «Du seier at eg er konge», svara Jesus. «Til dette er eg fødd, og til dette er eg komen til verda, at eg skal vitna om sanninga. Kvar den som er av sanninga, høyrer mi røyst.»

³⁸«Kva er sanning?» sa Pilatus. Dermed gjekk han ut til jødane att og sa til dei: «Eg finn inga skuld hos denne mannen.

³⁹Men de er vane med at eg gjev dykk ein mann fri til påske. Vil de at eg skal gje dykk kongen over jødane fri?»

⁴⁰Då ropa dei endå ein gong: «Ikkje han, men Barabbas!» Men Barabbas var ein røvar.