Read nynorsk 2011 Johannes 2 Bible Online

Johannes 2 - nynorsk 2011 bible

Johannes 2

¹Tredje dagen var det eit bryllaup i Kana i Galilea. Mor til Jesus var der.

²Også Jesus og læresveinane hans var bedne.

³Då det var slutt på vinen, sa Jesu mor til han: «Dei har ikkje meir vin.»

⁴[13] «Kva vil du meg, kvinne?» svara Jesus. «Min time er enno ikkje komen.»

⁵Då sa mor hans til tenarane: «Det han seier dykk, skal de gjera.»

⁶[14] No stod det seks vasskar av stein der, slike som blir nytta i reinsingsskikkane til jødane. Kvart av dei tok to eller tre anker.

⁷«Fyll kara med vatn», sa Jesus. Og tenarane fylte dei til randa.

⁸[15] Så sa han til dei: «Aus no opp og ber det til kjøkemeisteren.» Det gjorde dei.

⁹Kjøkemeisteren smaka på vatnet, som hadde vorte til vin. Han visste ikkje kvar vinen kom frå, men tenarane som hadde aust opp vatnet, visste det. Då ropa han på brudgomen

¹⁰og sa: «Alle andre set først fram den gode vinen, og når gjestene er drukne, kjem dei med den som er dårlegare. Du har gøymt den gode vinen til no.»

¹¹Dette var det første teiknet Jesus gjorde; det var i Kana i Galilea. Han openberra sin herlegdom, og læresveinane hans trudde på han.

¹²Sidan drog han ned til Kapernaum saman med mor si, brørne sine og læresveinane sine, og der vart dei verande nokre dagar.

¹³Det nærma seg no påskehøgtida til jødane, og Jesus gjekk opp til Jerusalem.

¹⁴[16] På tempelplassen fann han dei som selde oksar, sauer og duer, og pengevekslarane som sat der.

¹⁵Då laga han seg ei svepe av reip og dreiv dei alle ut av heilagdomen, og sauene og oksane med. Myntane til pengevekslarane kasta han utover og velte borda deira,

¹⁶og til dei som selde duer, sa han: «Få dette ut herifrå! Gjer ikkje huset åt Far min til ein marknadsplass!»

¹⁷Læresveinane hans hugsa at det står skrive: Brennande iver for ditt hus vil tæra meg opp!

¹⁸Då tok jødane til orde og spurde han: «Kan du visa oss eit teikn på at du har rett til å gjera dette?»

¹⁹Jesus svara: «Riv ned dette tempelet, og eg skal reisa det opp att på tre dagar.»

²⁰[17] Då sa jødane: «I førtiseks år har dei bygd på dette tempelet, og du vil reisa det opp att på tre dagar?»

²¹Men det tempelet han tala om, var hans eigen kropp.

²²Då han hadde stått opp frå dei døde, hugsa læresveinane hans at han hadde sagt dette, og dei trudde Skrifta og det ordet Jesus hadde sagt.

²³Medan han var i Jerusalem i påskehøgtida, kom mange til tru på namnet hans, for dei såg dei teikna han gjorde.

²⁴Men Jesus var ikkje fortruleg mot dei, for han kjende alle,

²⁵og han trong ikkje at nokon skulle vitna om mennesket. Kva som budde i mennesket, visste han sjølv.