Read nynorsk 2011 Johannes 9 Bible Online

Johannes 9 - nynorsk 2011 bible

Johannes 9

¹Då Jesus kom gåande, fekk han sjå ein mann som hadde vore blind frå han var fødd.

²Læresveinane spurde: «Rabbi, kven er det som har synda, han eller foreldra hans, sidan han vart fødd blind?»

³Jesus svara: «Verken han eller foreldra hans har synda. Men no kan Guds gjerningar bli openberra på han.

⁴Så lenge det er dag, må vi gjera hans gjerningar som har sendt meg. Det kjem ei natt då ingen kan arbeida.

⁵Så lenge eg er i verda, er eg lyset i verda.»

⁶Då han hadde sagt det, spytta han på jorda og laga til litt leire av spyttet og smurde på auga til mannen.

⁷[52] Så sa han: «Gå og vask deg i Siloa-dammen!» Siloa tyder utsend. Mannen gjekk dit og vaska seg, og då han kom att, kunne han sjå.

⁸Naboane og dei som før hadde sett at han var tiggar, sa då: «Er ikkje dette han som sat og tigga?»

⁹«Jau, det er han», sa somme. Andre sa: «Nei, men han liknar.» Sjølv sa han: «Det er eg.»

¹⁰«Korleis vart auga dine opna?» spurde dei.

¹¹Han svara: «Den mannen som heiter Jesus, laga til litt leire og smurde på auga mine og sa: ‘Gå til Siloa-dammen og vask deg!’ Eg gjekk dit, og då eg hadde vaska meg, kunne eg sjå.»

¹²«Kvar er denne mannen?» spurde dei. «Eg veit ikkje», svara han.

¹³Så førte dei mannen som hadde vore blind, til farisearane.

¹⁴[53] Det var sabbat den dagen Jesus hadde laga til leire og opna auga hans.

¹⁵Også farisearane spurde korleis han hadde fått synet. «Han la leire på auga mine», svara mannen, «så vaska eg meg, og no ser eg.»

¹⁶Då sa nokre av farisearane: «Denne mannen er ikkje frå Gud sidan han ikkje held sabbaten.» Andre sa: «Korleis kan eit syndig menneske gjera slike teikn?» Det vart usemje mellom dei om dette.

¹⁷Så spurde dei på nytt han som hadde vore blind: «Kva meiner du om han, sidan det var dine auge han opna?» «Han er ein profet», svara mannen.

¹⁸Jødane ville ikkje tru at han hadde vore blind og no kunne sjå. Difor sende dei bod på foreldra til han som hadde fått synet att,

¹⁹og spurde dei: «Er dette son dykkar, han som de seier er fødd blind? Korleis har det seg då at han kan sjå?»

²⁰Foreldra svara: «Vi veit at dette er vår son, og at han er fødd blind.

²¹Men korleis det har seg at han no kan sjå, det veit vi ikkje, og heller ikkje veit vi kven som har opna auga hans. Spør han sjølv! Han er gammal nok til å svara for seg.»

²²[54] Dette sa dei fordi dei var redde jødane. For jødane hadde alt vorte einige om at den som vedkjende at Jesus var Messias, skulle støytast ut av synagogen.

²³Difor sa foreldra hans: «Han er gammal nok, spør han sjølv.»

²⁴Andre gongen henta dei han som hadde vore blind, og sa til han: «Gjev Gud æra! Vi veit at dette mennesket er ein syndar.»

²⁵Han svara: «Om han er ein syndar, det veit eg ikkje. Men dette veit eg: Eg var blind, og no ser eg.»

²⁶«Kva gjorde han med deg?» spurde dei. «Korleis opna han auga dine?»

²⁷«Eg har alt sagt dykk det», sa han, «og de ville ikkje høyra på meg. Kvifor vil de høyra det om att? Kanskje vil de òg bli læresveinane hans?»

²⁸Dei skjelte han ut og sa: «Du er læresveinen hans, vi er læresveinane til Moses.

²⁹Vi veit at Gud har tala til Moses, men vi veit ikkje kvar dette mennesket er ifrå.»

³⁰«Det er då underleg», sa mannen, «at de ikkje veit kvar han er ifrå, endå han har opna auga mine.

³¹Vi veit at Gud ikkje høyrer på syndarar, men han høyrer på den som har gudsfrykt og gjer etter hans vilje.

³²Så lenge verda har stått, har ein aldri høyrt om at nokon har opna auga på ein som er fødd blind.

³³Var ikkje denne mannen frå Gud, kunne han ingen ting gjera.»

³⁴Dei svara: «Du er fødd syndar tvers igjennom, og du vil læra oss?» Så kasta dei han ut.

³⁵Jesus fekk høyra at dei hadde kasta han ut, og då han møtte mannen, spurde han: «Trur du på Menneskesonen?»

³⁶Mannen svara: «Kven er han då, gode herre, så eg kan tru på han?»

³⁷«Du har sett han», sa Jesus. «Det er han som no snakkar med deg.»

³⁸«Eg trur, Herre», sa mannen. Og han tilbad han.

³⁹Då sa Jesus: «Til dom er eg komen til denne verda, så dei som ikkje ser, skal sjå, og dei som ser, skal bli blinde.»

⁴⁰Nokre av farisearane som stod der, høyrde dette og sa til han: «Kanskje vi òg er blinde?»

⁴¹Jesus svara: «Var de blinde, hadde de inga synd. Men no seier de ‘Vi ser!’ Difor blir synda dykkar ståande.»