Read nynorsk 2011 Romarane 12 Bible Online

Romarane 12 - nynorsk 2011 bible

Romarane 12

¹[29] Difor legg eg dykk på hjartet, sysken, ved Guds miskunn, at de må bera fram kroppen dykkar som eit levande og heilagt offer, til glede for Gud. Det skal vera dykkar åndelege gudsteneste.

²Og innrett dykk ikkje etter denne verda, men lat dykk omskapa ved at de får eit nytt sinn og kan dømma om kva som er Guds vilje: det gode, det som er til glede for Gud, det fullkomne.

³Ved den nåden eg har fått, seier eg til kvar og ein av dykk: Tenk ikkje for store tankar om deg sjølv, men bruk forstand og ver sindig! — kvar og ein etter den trua som Gud har tilmålt han.

⁴Vi har éin kropp, men mange lemer, og alle lemene har kvar sine oppgåver.

⁵På same måten er vi alle éin kropp i Kristus, men kvar for oss er vi lemer for kvarandre.

⁶Vi har ulike nådegåver alt etter den nåden Gud har gjeve oss. Den som har profetgåve, skal bruka henne i samsvar med trua;

⁷den som har ei teneste, skal ta seg av tenesta si. Den som er lærar, skal ta seg av opplæringa,

⁸[30] og den som trøystar, skal verkeleg trøysta. Den som gjev av sitt eige, skal gjera det av eit heilt hjarte, den som er sett til å leia, skal gjera det med iver, den som gjer miskunn, skal gjera det med glede.

⁹Lat kjærleiken vera ekte! Avsky det vonde og hald dykk til det gode!

¹⁰Elsk kvarandre med inderleg syskenkjærleik; set dei andre høgare enn dykk sjølve!

¹¹Ver ikkje lunka, men ivrige. Ver brennande i Anden, ten Herren!

¹²Ver glade i vona, tolmodige i motgangen, uthaldande i bøna.

¹³Ver med og hjelp dei heilage som lid naud, og legg vinn på å vera gjestfrie.

¹⁴Velsign dei som forfølgjer dykk, velsign og forbann ikkje.

¹⁵Gled dykk med dei glade og gråt med dei som græt.

¹⁶Ha ei og same haldninga dykk imellom, trakt ikkje etter det høge, men hald dykk gjerne til det låge. Ver ikkje sjølvkloke!

¹⁷Løn ikkje vondt med vondt; ha tanke for det som er godt for alle menneske.

¹⁸Gjer alt de kan for å halda fred med alle menneske, så langt det er mogleg.

¹⁹Ta ikkje hemn, mine kjære, men overlat vreiden til Gud. For det står skrive: Hemnen høyrer meg til, eg skal gjengjelda, seier Herren.

²⁰Men: Er fienden din svolten, så lat han få mat, er han tørst, så gjev han drikke. Gjer du det, samlar du glødande kol på hovudet hans.

²¹Lat ikkje det vonde få vinna over deg, men vinn over det vonde med det gode!