Read nynorsk 2011 Romarane 16 Bible Online

Romarane 16 - nynorsk 2011 bible

Romarane 16

¹Eg vil leggja inn eit godt ord hos dykk for Føbe, syster vår; ho er ein diakon frå forsamlinga i Kenkreæ.

²Ta imot henne i Herren som det sømer seg for dei heilage. Stå til teneste for henne i alle oppgåver der ho kan trenga hjelp av dykk. For sjølv har ho vore til hjelp for mange, også for meg.

³Hels Priska og Akvilas, medarbeidarane mine i Kristus Jesus.

⁴Dei la halsen på blokka for å berga livet mitt, noko ikkje berre eg, men alle dei heidningkristne forsamlingane vil takka dei for.

⁵[41] Hels òg forsamlinga som kjem saman i huset deira. Hels min kjære Epainetos, han som er den første frukta for Kristus i Asia.

⁶Hels Maria, som har arbeidd og slite så mykje for dykk.

⁷[42] Hels Andronikos og Junia, som er landsmennene mine og fengselskameratane mine. Dei har eit godt namn mellom apostlane, og dei kom til trua på Kristus før meg.

⁸Hels Ampliatus, min kjære ven i Herren.

⁹Hels Urbanus, vår medarbeidar i Kristus, og min kjære Stakys.

¹⁰Hels Apelles, som er vel prøvd i Kristus. Hels alle hos Aristobolos.

¹¹Hels Herodion, landsmannen min. Hels alle hos Narkissos som høyrer Herren til.

¹²Hels Tryfena og Tryfosa, som arbeider hardt for Herren. Hels den kjære Persis, som har arbeidd så mykje for Herren.

¹³Hels Rufus, Herrens utvalde, og mor hans; ho har vore ei mor for meg òg.

¹⁴Hels Asynkritos, Flegon, Hermes, Patrobas, Hermas og syskena som er saman med dei.

¹⁵Hels Filologos og Julia, Nerevs og syster hans og Olympas, og alle dei heilage som er saman med dei.

¹⁶[43] Hels kvarandre med eit heilagt kyss! Alle Kristi forsamlingar helsar dykk.

¹⁷Eg legg dykk på hjartet, sysken, at de må halda auge med dei som skaper splitting og får dykk til å falla frå den læra de har teke imot. Hald dykk ifrå dei!

¹⁸Slike menneske tener ikkje Herren Jesus Kristus, men sin eigen mage. Med fine ord og lokkande tale forfører dei slike som er godtruande av hjartet.

¹⁹Men alle har høyrt om lydnaden dykkar, og difor gleder eg meg over dykk. Eg vil at de skal vera kloke i det gode og uskuldige i det vonde.

²⁰Må fredens Gud snart knusa Satan under føtene dykkar! Vår Herre Jesu nåde vere med dykk!

²¹Timoteus, medarbeidaren min, og Lukius, Jason og Sosipater, landsmennene mine, helsar dykk.

²²Eg, Tertius, som har skrive ned brevet, helsar dykk i Herren.

²³Gaius, som er vert for meg og heile forsamlinga, helsar dykk. Erastos, rekneskapsføraren i byen, helsar dykk, like eins Kvartus, bror vår.

²⁴[44] {{Vår Herre Jesu Kristi nåde vere med dykk alle! Amen.}}

²⁵[45] Lova vere Gud, han som har makt til å styrkja dykk med mitt evangelium, bodskapen om Jesus Kristus, etter openberringa av det mysteriet som har vore løynt frå evige tider,

²⁶men som no er kome for dagen. Gjennom profetiske skrifter og etter påbod frå den evige Gud er dette mysteriet no kunngjort for alle folkeslag for å føra dei til lydnad i tru.

²⁷Han, den einaste vise Gud, vere ære ved Jesus Kristus i all æve! Amen.