Read nynorsk 2011 Romarane 6 Bible Online

Romarane 6 - nynorsk 2011 bible

Romarane 6

¹Kva skal vi då seia? Skal vi halda fram i synda så nåden kan bli så mykje større?

²Langt ifrå! Korleis kan vi som har døydd bort frå synda, framleis leva i henne?

³Eller veit de ikkje at alle vi som vart døypte til Kristus Jesus, vart døypte til døden hans?

⁴Vi vart gravlagde med han då vi vart døypte med denne dåpen til døden. Og slik Kristus vart oppreist frå dei døde ved sin Fars herlegdom, skal vi òg vandra i eit nytt liv.

⁵Har vi vakse saman med Kristus i ein død som er lik hans, skal vi òg vera eitt med han i ei oppstode som er lik hans.

⁶Vi veit at vårt gamle menneske vart krossfest med han, for at den kroppen som er underlagd synda, skulle gjerast til inkjes og vi ikkje lenger skulle vera slavar under synda.

⁷For synda har ikkje lenger nokon rett over den som er død.

⁸Men er vi døde med Kristus, trur vi at vi òg skal leva med han.

⁹Vi veit at når Kristus er oppreist frå dei døde, då døyr han ikkje meir, for døden har ikkje lenger makt over han.

¹⁰Døden han døydde, den døydde han for synda, éin gong for alle, men livet han lever, det lever han for Gud.

¹¹På same måten skal de rekna dykk som døde for synda, men levande for Gud i Kristus Jesus.

¹²Lat då ikkje synda rå i den dødelege kroppen dykkar, så de gjev etter for lystene i denne kroppen.

¹³Og byd ikkje lemene dykkar fram til teneste for synda, som våpen for uretten. Men byd dykk sjølve og lemene dykkar fram til teneste for Gud, som våpen for det som er rett. For de var døde og har fått liv.

¹⁴Synda skal ikkje vera herre over dykk. For de er ikkje under lova, men under nåden.

¹⁵Kva skal vi då seia? Skal vi synda sidan vi ikkje er under lova, men under nåden? Langt ifrå!

¹⁶Veit de ikkje at når de byd dykk fram som slavar for nokon og lyder han, då er de verkeleg slavar under den som rår over dykk? De blir anten slavar under synda, og det fører til død, eller under lydnaden, og det fører til rettferd.

¹⁷Men Gud vere takk! De som før var slavar under synda, har no av hjartet vorte lydige mot den læra som de vart overgjevne til.

¹⁸De vart sette fri frå synda og er slavar for rettferda —

¹⁹eg bruker eit bilete frå dagleglivet sidan de er veike, av kjøt og blod. Før baud de fram lemene dykkar til teneste for det ureine og det urette, og det førte berre til urett. Men no skal de by fram lemene dykkar til teneste for rettferda, så de kan bli heilage.

²⁰Medan de var slavar under synda, var de frie frå det som er rett.

²¹Kva slags frukter hausta de av det? Slike som de no skammar dykk over, for dei fører til døden.

²²Men no er de frigjorde frå synda og har vorte tenarar for Gud, og frukta er eit liv i helging, og det fører til evig liv.

²³For den løn synda gjev, er døden, men Guds nådegåve er evig liv i Kristus Jesus, vår Herre.