Read nynorsk 2011 1. Korintar 10 Bible Online

1. Korintar 10 - nynorsk 2011 bible

1. Korintar 10

¹Eg vil ikkje, sysken, at de skal vera uvitande om dette: Fedrane våre i øydemarka var alle under skya og gjekk alle gjennom havet.

²Alle vart døypte til Moses i skya og i havet,

³og dei åt alle den same åndelege maten

⁴og drakk alle den same åndelege drikken. For dei drakk av det åndelege berget som følgde dei, og berget var Kristus.

⁵Likevel hadde Gud inga glede i dei fleste av dei, for dei vart nedslegne i øydemarka.

⁶Desse hendingane er åtvarande eksempel for oss. Dei skal læra oss at vi ikkje skal ha lyst til det vonde, slik som dei hadde.

⁷[37] Ver ikkje avgudsdyrkarar slik nokre av dei var, som det står skrive: Folket sette seg ned og åt og drakk, og så stod dei opp og gav seg til å dansa.

⁸Lat oss heller ikkje driva hor, slik nokre av dei dreiv hor, så tjuetre tusen menneske fall på ein dag.

⁹Heller ikkje må vi setja Kristus på prøve, slik nokre av dei gjorde og vart drepne av ormane.

¹⁰Og de må ikkje vera misnøgde og murra, slik nokre av dei murra og vart drepne av øydeleggjaren.

¹¹Det som hende med dei, skulle vera til åtvaring. Det er skrive ned til rettleiing for oss, og til oss er dei siste tider komne.

¹²Difor må den som trur at han står, passa på at han ikkje fell.

¹³De har ikkje møtt andre freistingar enn slike som høyrer menneskelivet til. Og Gud er trufast, han skal ikkje la dykk bli freista over evne. Nei, midt i freistinga vil han òg visa ein utveg, så de kan halda ut.

¹⁴Difor, mine kjære, hald dykk langt borte frå avgudsdyrkinga!

¹⁵Eg talar til dykk som til forstandige menneske. Døm sjølve om det eg seier!

¹⁶[38] Velsigningsbegeret som vi velsignar, gjev det ikkje del i Kristi blod? Brødet som vi bryt, gjev det ikkje del i Kristi kropp?

¹⁷Fordi det er eitt brød, er vi alle éin kropp. For vi har alle del i det eine brødet.

¹⁸Sjå på Israelsfolket! Har ikkje dei som et av offeret, del i det som skjer på altaret?

¹⁹Kva meiner eg med dette? At eit avgudsoffer har noko for seg, eller at ein avgud er noko?

²⁰Nei, men at det dei ofrar, det ofrar dei til vonde ånder og ikkje til Gud. Men eg vil ikkje at de skal ha fellesskap med vonde ånder.

²¹De kan ikkje drikka både Herrens beger og begeret til vonde ånder. De kan ikkje vera med både ved Herrens bord og ved bordet til vonde ånder.

²²Eller vågar vi vekkja Herrens harme? Er vi sterkare enn han?

²³Alt har eg lov til, men ikkje alt tener til det gode. Alt har eg lov til, men ikkje alt byggjer opp.

²⁴Ingen må søkja sitt eige beste, men det som er best for den andre.

²⁵Alt som blir selt på torget, kan de eta med godt samvit utan å spørja om det er offerkjøt.

²⁶For jorda og det som fyller henne, høyrer Herren til.

²⁷Om ein av dei som ikkje trur, bed dykk heim til seg, og de gjerne vil koma, så et med godt samvit alt som blir sett fram for dykk, utan å spørja kva det er.

²⁸Men seier nokon til dykk: «Dette er offerkjøt», så et det ikkje — for hans skuld som sa det, og for samvitet skuld.

²⁹Og då meiner eg hans samvit, ikkje ditt. For kvifor skal min fridom dømmast av samvitet til ein annan?

³⁰Om eg tek imot dette med takk, kvifor skal eg då klandrast for det som eg takkar Gud for?

³¹Men anten de et eller drikk, eller kva de gjer, så gjer det alt til Guds ære!

³²Lat korkje jøde eller grekar eller Guds kyrkje få noko å støyta seg på!

³³Eg prøver sjølv å vera alle til lags på alle vis. Eg søkjer ikkje mitt eige beste, men det som er best for andre, så dei kan bli frelste.