Read nynorsk 2011 1. Korintar 15 Bible Online

1. Korintar 15 - nynorsk 2011 bible

1. Korintar 15

¹[45] Eg kunngjer dykk, sysken, det evangeliet som eg forkynte dykk, som de òg tok imot, som de òg står støe i.

²Ved det blir de frelste, så sant de held fast på ordet slik eg forkynte det for dykk; elles blir det til inga nytte at de kom til trua.

³For først og fremst overgav eg til dykk det som eg sjølv hadde motteke, at Kristus døydde for syndene våre, som skriftene har sagt,

⁴ at han vart gravlagd, at han stod opp att tredje dagen, som skriftene har sagt,

⁵ [46] og at han synte seg for Kefas og deretter for dei tolv.

⁶Så synte han seg for meir enn fem hundre sysken på ein gong. Dei fleste av dei lever enno, men nokre har sovna inn.

⁷Sidan synte han seg for Jakob, så for alle apostlane.

⁸[47] Og aller sist synte han seg òg for meg, eg som berre er eit ufullbore foster.

⁹For eg er den minste av apostlane; eg er ikkje verdig til å kallast apostel, for eg har forfølgt Guds kyrkje.

¹⁰Men av Guds nåde er eg det eg er, og hans nåde mot meg har ikkje vore bortkasta. For eg har arbeidd meir enn dei alle, det vil seia, ikkje eg, men Guds nåde som er med meg.

¹¹Anten det no er eg eller dei andre — dette forkynner vi, og dette har de teke imot i tru.

¹²Men når det blir forkynt at Kristus har stått opp frå dei døde, korleis kan då somme av dykk seia at det ikkje finst noka oppstode frå dei døde?

¹³For er det inga oppstode frå dei døde, så har heller ikkje Kristus stått opp.

¹⁴Men har ikkje Kristus stått opp, er bodskapen vår tom, og tom er òg trua dykkar.

¹⁵Då står vi som falske vitne om Gud. For då har vi vitna imot Gud når vi seier at han har reist Kristus opp, noko han ikkje har gjort dersom døde ikkje står opp.

¹⁶For står ikkje døde opp, så har heller ikkje Kristus stått opp.

¹⁷Men har ikkje Kristus stått opp, då er trua dykkar meiningslaus, og de er enno i syndene dykkar.

¹⁸Då er òg dei fortapte som har sovna inn i Kristus.

¹⁹Har vi berre for dette livet sett vårt håp til Kristus, då er vi ynkelegare enn alle menneske.

²⁰[48] Men no er Kristus oppstaden frå dei døde. Han er førstegrøda av dei som har sovna inn.

²¹Fordi døden er komen ved eit menneske, så er òg oppstoda av dei døde komen ved eit menneske.

²²For liksom alle døyr på grunn av Adam, skal alle få liv ved Kristus.

²³Men kvar til si tid: Kristus er førstegrøda, deretter følgjer dei som høyrer Kristus til, når han kjem.

²⁴Så kjem enden, når han overgjev kongsmakta til Gud, sin Far, etter at han har utsletta all makt og alt herredøme og alt velde.

²⁵For han skal vera konge til Gud har lagt alle fiendar under hans føter.

²⁶Den siste fienden som blir gjord til inkjes, er døden.

²⁷For alt har han lagt under hans føter. Når det heiter alt, er det klårt at Gud sjølv er unnateken frå dette. For det er Gud som har lagt alt under han.

²⁸Men når alt er han underlagt, skal òg Sonen sjølv gje seg inn under Gud, som har lagt alt under han, og Gud skal vera alt i alle.

²⁹[49] Kvifor lèt somme seg døypa for dei døde? Dersom døde ikkje står opp, kvifor lèt somme seg då døypa for dei?

³⁰Og kvifor set vi oss i fare kvar time på dagen?

³¹Ja, mine sysken, eg døyr kvar dag, det er like sant som at eg er stolt av dykk i Kristus Jesus, vår Herre.

³²Var det berre med eit reint menneskeleg håp eg kjempa mot villdyr i Efesos, kva godt hadde det tent til for meg? Dersom dei døde ikkje står opp att, så lat oss eta og drikka, for i morgon døyr vi!

³³[50] Far ikkje vill! «Dårleg selskap øydelegg gode vanar.»

³⁴Vakn opp av rusen for alvor og synd ikkje! For somme av dykk kjenner ikkje Gud. Til skam for dykk må eg seia det.

³⁵Men no kunne nokon seia: «Korleis står dei døde opp? Kva slag kropp har dei?»

³⁶Å, uvituge menneske! Det du sår, gjev ikkje nytt liv utan at det døyr.

³⁷Og det du sår, er ikkje det akset som veks opp, men eit nake korn, anten det er av kveite eller av anna såkorn.

³⁸Men Gud lèt det få den skapnad som han har vilja, kvart slag korn sin eigen skapnad.

³⁹Ikkje alt kjøt er av same slag. Det er eitt slag kjøt i menneske, eitt i fe, eitt i fugl, eitt i fisk.

⁴⁰Og det finst himmelske kroppar og jordiske kroppar; ein glans har dei himmelske, ein annan dei jordiske.

⁴¹Ein glans har sola, ein annan har månen og ein annan stjernene. Den eine stjerna lyser med klårare glans enn den andre.

⁴²Slik er det òg med oppstoda frå dei døde. Det som blir sådd, er forgjengeleg. Men det som står opp, er uforgjengeleg.

⁴³Det blir sådd i vanære, det står opp i herlegdom. Det blir sådd i vanmakt, det står opp i kraft.

⁴⁴Det blir sådd ein kropp som hadde sjel, det står opp ein åndeleg kropp. Så visst som det finst ein kropp med sjel, finst det òg ein åndeleg kropp.

⁴⁵[51] Slik står det skrive: Det første mennesket, Adam, vart til ei levande sjel. Den siste Adam vart ei ånd som gjev liv.

⁴⁶Det åndelege var ikkje det første, men det sjelelege. Så kom det åndelege.

⁴⁷Det første mennesket var frå jorda og skapt av jord, det andre mennesket er frå himmelen.

⁴⁸Slik som det jordiske mennesket var, så er òg dei jordiske, og slik som den himmelske er, så skal òg dei himmelske vera.

⁴⁹Og liksom vi har bore biletet av det jordiske mennesket, så skal vi òg bera biletet av den himmelske.

⁵⁰Men det seier eg, sysken, at kjøt og blod kan ikkje arva Guds rike, og det som er forgjengeleg, skal ikkje arva det uforgjengelege.

⁵¹Sjå, eg seier dykk ein løyndom: Vi skal ikkje alle sovna inn, men vi skal alle bli omskapte,

⁵²i hast, i ein augneblink, når den siste basunen lyder. For basunen skal lyda, og dei døde skal stå opp uforgjengelege, og vi skal bli omskapte.

⁵³For dette forgjengelege må bli kledd i uforgjengelegdom, og dette dødelege kledd i udødelegdom.

⁵⁴Men når dette forgjengelege er ikledd uforgjengelegdom og dette dødelege er ikledd udødelegdom, då blir det ordet oppfylt som står skrive: Døden er slukt og sigeren vunnen.

⁵⁵ Død, kvar er din brodd? Død, kvar er din siger?

⁵⁶Brodden i døden er synda, og krafta i synda er lova.

⁵⁷Men Gud vere takk som gjev oss siger ved vår Herre Jesus Kristus!

⁵⁸Difor, mine kjære sysken, ver støe og urikkelege. Ta stadig rik del i Herrens gjerning! For de veit at i Herren er ikkje arbeidet dykkar nyttelaust.