Read nynorsk 2011 1. Korintar 16 Bible Online

1. Korintar 16 - nynorsk 2011 bible

1. Korintar 16

¹[52] Når det gjeld innsamlinga til dei heilage, skal de følgja dei påbod eg gav forsamlingane i Galatia.

²Første dagen i veka skal kvar av dykk leggja til sides heime hos seg sjølv så mykje som de er i stand til, så innsamlinga ikkje skal byrja først når eg kjem.

³Når eg så kjem, skal eg senda brev med dei som de finn skikka til det, og dei skal føra gåva dykkar til Jerusalem.

⁴Og skulle det visa seg å vera best at eg òg reiser, kan dei reisa saman med meg.

⁵Eg skal koma til dykk når eg har vore i Makedonia, for Makedonia skal eg reisa gjennom.

⁶Men hos dykk blir eg kanskje verande ei tid, eller til og med vinteren over. Så kan de utrusta meg til ferda vidare, kvar ho så går.

⁷For denne gongen vil eg ikkje koma til dykk berre på gjennomreise. Eg håpar å kunna stansa ei tid, om Herren gjev meg lov.

⁸[53] I Efesos blir eg verande til pinse.

⁹[54] For her står døra vidopen for meg til ei rik gjerning, og det er mange motstandarar.

¹⁰Dersom Timoteus kjem, må de sjå til at han kan kjenna seg trygg hos dykk. For han gjer Herrens gjerning slik eg gjer,

¹¹[55] og ingen skal sjå ned på han. Hjelp han i veg og lat han fara med fred, så han kan koma tilbake, for eg ventar på han saman med syskena våre.

¹²[56] Når det gjeld Apollos, bror vår, har eg bede han inderleg om å reisa til dykk saman med brørne. Men han er slett ikkje villig til å reisa no. Han kjem så snart han får høve til det.

¹³Ver vakne! Stå faste i trua! Ver modige! Ver sterke!

¹⁴Lat alt de gjer, bli gjort i kjærleik!

¹⁵[57] Endå ein ting legg eg dykk på hjartet, mine sysken. De veit at husstanden til Stefanas var den første frukta i Akaia, og at dei har vigd seg til teneste for dei heilage.

¹⁶De òg må underordna dykk under slike som dei og under kvar medarbeidar som gjer si gjerning.

¹⁷Eg gleder meg over at Stefanas og Fortunatus og Akaikos er komne. Det har vege opp saknet av dykk.

¹⁸For dei har sett nytt mot i både meg og dykk. Slike som dei skal de visa respekt.

¹⁹Forsamlingane i Asia helsar dykk. Akvilas og Priska og forsamlinga som kjem saman i huset deira, helsar dykk hjarteleg i Herrens namn.

²⁰Alle syskena dykkar her sender si helsing. Hels kvarandre med eit heilagt kyss!

²¹Eg, Paulus, skriv denne helsinga med mi eiga hand.

²²[58] Om nokon ikkje elskar Herren, forbanna vere han! Marana ta!

²³Herren Jesu nåde vere med dykk!

²⁴Min kjærleik er med dykk alle i Kristus Jesus.