Read nynorsk 2011 1. Korintar 6 Bible Online

1. Korintar 6 - nynorsk 2011 bible

1. Korintar 6

¹Når ein av dykk har ei sak mot ein annan, korleis kan han då våga å leggja henne fram for dei urettferdige og ikkje for dei heilage?

²Veit de ikkje at dei heilage skal dømma verda? Og når de skal dømma verda, kvifor duger de ikkje då til å dømma i småsaker?

³Eller veit de ikkje at vi skal dømma englar? Kan de ikkje då dømma i reint jordiske saker?

⁴Men når de har slike jordiske rettssaker, korleis kan de då setja folk til dommarar som ikkje har tillit i forsamlinga?

⁵Dette seier eg for at de kan skamma dykk! Finst det ikkje ein einaste vitug hos dykk som kan dømma i ei sak mellom brør?

⁶Nei, bror fører sak mot bror, og det for dommarar som ikkje trur.

⁷Det er i det heile eit nederlag for dykk at de har rettssaker mot kvarandre. Kvifor lid de ikkje heller urett? Kvifor lid de ikkje heller tap?

⁸Men de gjer urett og lèt andre lida tap — til og med sysken.

⁹[24] Veit de ikkje at dei som gjer urett, ikkje skal arva Guds rike? Far ikkje vill! Verken dei som lever i hor, dei som dyrkar avgudar eller dei som bryt ekteskapet, verken menn som ligg med menn eller lèt seg liggja med,

¹⁰verken tjuvar, grådige, drankarar, spottarar eller ransmenn skal arva Guds rike.

¹¹Slike har somme av dykk vore. Men no er de vaska reine, de har vorte helga, de er gjorde rettferdige i Herren Jesu Kristi namn og i vår Guds Ande.

¹²Alt har eg lov til, men ikkje alt tener til det gode. Alt har eg lov til, men eg skal ikkje la noko få makt over meg.

¹³Maten er til for magen, og magen for maten, men Gud skal gjera ende på dei begge. Kroppen er ikkje for hor; han er for Herren, og Herren er for kroppen.

¹⁴Gud reiste opp Herren, og ved si kraft skal han òg reisa oss opp.

¹⁵Veit de ikkje at kroppane dykkar er Kristi lemer? Skal eg då ta Kristi lemer og gjera dei til horelemer? Langt ifrå!

¹⁶Eller veit de ikkje at den som held seg til ei hore, er éin kropp med henne? For det er sagt: Dei to skal vera éin kropp.

¹⁷Men den som held seg til Kristus, er éi ånd med han.

¹⁸Hald dykk langt borte frå hor! All synd som eit menneske gjer, er utanfor kroppen. Men den som driv hor, syndar mot sin eigen kropp.

¹⁹Veit de ikkje at kroppen dykkar er eit tempel for Den heilage ande som bur i dykk, han som de har frå Gud? De er ikkje lenger dykkar eigne:

²⁰[25] De er kjøpte, og prisen er betalt. Difor skal de æra Gud med kroppen!