Read nynorsk 2011 2. Korintar 3 Bible Online

2. Korintar 3 - nynorsk 2011 bible

2. Korintar 3

¹Byrjar vi no igjen å koma med lovord om oss sjølve? Eller treng vi, som visse andre, brev med tilråding frå dykk eller til dykk?

²[14] Nei, de er sjølve vårt tilrådingsbrev, skrive i hjarta våre, kjent og lese av alle menneske.

³[15] For de viser at de er Kristi brev, som har vorte til ved vår teneste. Det er ikkje skrive med blekk, men med den levande Guds Ande, ikkje på steintavler, men i hjarta, på tavler av kjøt og blod.

⁴Denne tilliten har vi til Gud ved Kristus.

⁵Men dette er vi ikkje i stand til av oss sjølve; vi kan ikkje tenkja ut noko som om det kom frå oss. Nei, berre ved Gud er vi i stand til dette,

⁶han som òg gjorde oss til tenarar for ei ny pakt som ikkje byggjer på bokstav, men på Ande. For bokstaven slår i hel, men Anden gjer levande.

⁷Sjølv den tenesta som førte til død, den som var føreskriven med bokstavar hogne i stein, var omgjeven av ein slik herlegdom og glans at israelittane ikkje greidde å sjå Moses i andletet. Så sterkt stråla det, endå det var ein glans som vart borte.

⁸Kor mykje sterkare glans har ikkje då Andens teneste?

⁹For var det ein herleg glans kring den tenesta som førte til fordømming, så må den tenesta som fører til rettferd, stråla med ein endå rikare glans.

¹⁰Ja, det som den gongen var omgjeve av herlegdom, har mista glansen sin. For no strålar ein herlegdom som er så uendeleg mykje klårare.

¹¹For når det var herleg, det som vart borte, kor mykje herlegare må ikkje då det stråla som blir ståande?

¹²Når vi no har slikt eit håp, går vi frimodig fram.

¹³Vi gjer ikkje som Moses, som la eit slør over andletet så israelittane ikkje skulle sjå den minkande glansen før han var borte.

¹⁴[16] Men dei vart forherda. For heilt til denne dag ligg dette sløret der når dei les frå den gamle pakta, og det blir ikkje fjerna, for det er i Kristus det blir teke bort.

¹⁵Ja, heilt til denne dag ligg det eit slør over hjartet deira når det blir lese frå Moselova.

¹⁶Men når dei vender om til Herren, blir sløret teke bort.

¹⁷Herren, det er Anden, og der Herrens Ande er, der er fridom.

¹⁸Men vi som utan slør over andletet ser Herrens herlegdom som i ein spegel, vi blir alle omdanna til dette biletet, frå herlegdom til herlegdom, og dette skjer ved Herrens Ande.