Read nynorsk 2011 Galatarane 4 Bible Online

Galatarane 4 - nynorsk 2011 bible

Galatarane 4

¹Lat meg forklara dette. Så lenge ein arving er umyndig, er det ingen skilnad på han og slaven, endå han er herre over alt saman.

²Han står under formyndarar og hushaldarar heilt fram til den tida far hans har fastsett.

³[21] Slik er det òg med oss. Då vi var umyndige, var vi slavar under grunnkreftene i verda.

⁴Men då tida var fullkomen, sende Gud sin eigen Son, fødd av ei kvinne, fødd under lova.

⁵Han skulle kjøpa fri dei som var under lova, så vi kunne få retten til å vera Guds born.

⁶[22] Og sidan de er born, har Gud sendt sin Sons Ande inn i hjarta våre, og Anden ropar: «Abba, Far!»

⁷Difor er du ikkje lenger slave, men son. Og er du son, då er du òg arving, innsett av Gud.

⁸Den tid de ikkje kjende Gud, var de slavar under gudar som ikkje er verkelege gudar.

⁹Men no når de kjenner Gud — nei, meir enn det, når de er kjende av Gud — korleis kan de no på nytt venda attende til desse veike og fattige grunnkreftene? Vil de på nytt vera slavar under dei?

¹⁰[23] De held nøye rekning med dagar og månader, høgtider og år!

¹¹Eg er redd at eg har streva med dykk til inga nytte.

¹²Eg bed dykk, sysken: Ver som eg, for eg har vorte som de er! De har ikkje gjort urett mot meg.

¹³For de veit at det var på grunn av ein sjukdom eg fekk forkynna evangeliet for dykk første gongen.

¹⁴Men de lét dykk ikkje freista av dette til å forakta eller avsky meg; de tok imot meg som ein engel frå Gud, ja, som Kristus Jesus sjølv.

¹⁵Men kvar har gleda dykkar no vorte av? Det vitnemålet gjev eg dykk at de gjerne hadde rive ut auga og gjeve meg, om det lét seg gjera.

¹⁶Har eg no vorte ein fiende fordi eg seier dykk sanninga?

¹⁷Dei andre er etter dykk med ein iver som ikkje er av det gode, for dei vil skilja dykk frå oss og gjera dykk til sine tilhengjarar.

¹⁸Det er vel og bra at somme er ivrige alltid og ikkje berre når eg er hos dykk, men det må vera ein iver for det gode.

¹⁹Mine born, som eg på nytt føder med smerte til den tid Kristus tek skapnad i dykk

²⁰— eg skulle ønskja eg var hos dykk så eg kunne bruka ein annan tone når eg talar, for eg veit inga råd med dykk.

²¹Sei meg, de som vil vera under lova: Høyrer de ikkje på lova?

²²Det står skrive at Abraham hadde to søner, ein med slavekvinna og ein med den frie kvinna.

²³Son til slavekvinna er fødd etter naturens orden, medan son til den frie kvinna er fødd etter Guds lovnad.

²⁴Dette har ei djupare meining. Dei to kvinnene står for to pakter. Den eine, Hagar, er pakta frå Sinai-fjellet; ho føder til slaveri.

²⁵[24] Hagar står for Sinai-fjellet i Arabia og svarar til det noverande Jerusalem, som lever i slaveri med borna sine.

²⁶Men det Jerusalem som er i det høge, er fritt, og det er vår mor. For det står skrive:

²⁷ Gled deg, du barnlause, som ikkje fødde. Bryt ut i jubel, du som ikkje fekk rier. For den einslege kvinna har fleire born enn ho som har mann.

²⁸Og de, sysken, er born ut frå lovnaden liksom Isak.

²⁹Men han som var fødd etter naturens orden, forfølgde den gongen han som var fødd ved Anden, og slik er det i dag òg.

³⁰Men kva seier Skrifta? Driv bort slavekvinna og son hennar! For son til slavekvinna skal ikkje arva saman med son til den frie kvinna.

³¹Difor, sysken, er vi ikkje born av slavekvinna, men av den frie kvinna.