Read nynorsk 2011 Galatarane 5 Bible Online

Galatarane 5 - nynorsk 2011 bible

Galatarane 5

¹Til fridom har Kristus frigjort oss. Stå difor støtt og lat ikkje nokon tvinga dykk inn att under slaveåket.

²Høyr kva eg, Paulus, seier dykk: Lèt de dykk omskjera, vil ikkje Kristus vera til noka hjelp for dykk.

³På nytt slår eg fast at kvar den som lèt seg omskjera, er skuldig til å halda heile lova.

⁴De som vil bli rettferdige ved lova, er skilde frå Kristus; de er falne ut av nåden.

⁵Men vi ventar i Anden, ved tru, på den rettferda som er vår von.

⁶For i Kristus Jesus gjeld det verken å vera omskoren eller å vera uomskoren; her gjeld berre tru, verksam i kjærleik.

⁷De var komne godt i gang med løpet. Kven er det som har hindra dykk i å vera lydige mot sanninga?

⁸Kven har overtala dykk? Ikkje han som kalla dykk!

⁹[25] Litt surdeig gjennomsyrar heile deigen.

¹⁰Men i Herren har eg den tiltru til dykk at de ikkje vil tenkja annleis enn eg gjer. Den som forvirrar dykk, skal få sin dom, kven han så er.

¹¹Men om det er så, sysken, at eg enno forkynner omskjering, kvifor blir eg då forfølgd? Då er ikkje krossen ein snublestein lenger.

¹²[26] Må dei berre skjera av seg alt saman, dei som spreier uro mellom dykk!

¹³[27] De er kalla til fridom, sysken. Lat berre ikkje fridomen bli eit påskot til å gjera det kjøtet vil, men ten kvarandre i kjærleik.

¹⁴For heile lova er oppfylt i dette eine bodet: Du skal elska nesten din som deg sjølv.

¹⁵Men når de bit og glefser etter kvarandre, så pass på at de ikkje et kvarandre opp!

¹⁶Eg seier dykk: Lev eit liv i Anden! Då følgjer de ikkje dei vonde lystene i dykkar kjøt og blod.

¹⁷For det kjøtet vil, står Anden imot, og det Anden vil, står kjøtet imot. Dei to ligg i strid med kvarandre, så de ikkje kan gjera det de vil.

¹⁸Men blir de drivne av Anden, då er de ikkje under lova.

¹⁹[28] Det er klårt kva slag gjerningar som kjem frå kjøtet: hor, umoral, usømd,

²⁰avgudsdyrking, trolldom, fiendskap, strid, sjalusi, sinne, sjølvhevding, usemje, splittingar,

²¹misunning, fyll, festing og meir av det slaget. Eg har sagt det før og seier det på nytt: Dei som driv med slikt, skal ikkje arva Guds rike.

²²[29] Men Andens frukt er kjærleik, glede, fred, tolmod, mildskap, godleik, truskap,

²³audmjukskap og sjølvdisiplin. Slike ting er ikkje lova imot!

²⁴Dei som høyrer Kristus til, har krossfest kjøtet med lidenskapane og dei vonde lystene.

²⁵Lever vi ved Anden, så lat oss òg vandra i Anden.

²⁶Lat oss ikkje vera drivne av æresjuke så vi utfordrar og misunner kvarandre.