Read nynorsk 2011 Galatarane 6 Bible Online

Galatarane 6 - nynorsk 2011 bible

Galatarane 6

¹Mine sysken, skulle nokon bli gripen i eit feilsteg, så må de som har Anden, hjelpa han til rette. Men gjer det audmjukt og pass deg sjølv, så ikkje du òg blir freista.

²Ber børene for kvarandre og oppfyll på den måten Kristi lov.

³Dei som trur dei er noko, sjølv om dei ingenting er, lurer seg sjølve.

⁴Kvar og ein skal dømma om si eiga gjerning og få ros for det han sjølv gjer, ikkje for det andre har gjort.

⁵For kvar skal bera si eiga bør.

⁶Den som får opplæring i Ordet, skal dela alt godt med læraren sin.

⁷Far ikkje vill! Gud lèt seg ikkje spotta. Det eit menneske sår, skal det òg hausta.

⁸[30] Den som sår i sitt eige kjøt, haustar forderving frå kjøtet, men den som sår i Anden, haustar evig liv frå Anden.

⁹Lat oss ikkje trøytna medan vi gjer det gode! Når tida kjem, skal vi hausta, berre vi ikkje gjev opp.

¹⁰Så lat oss gjera godt mot alle så lenge det er tid, og mest mot vår familie i trua.

¹¹Sjå kor store bokstavar eg bruker når eg no med mi eiga hand skriv dette til dykk:

¹²Dei som vil tvinga dykk til omskjering, er slike som vil ta seg godt ut mellom menneske, så dei skal sleppa å bli forfølgde på grunn av Kristi kross.

¹³For dei som lèt seg omskjera, held ikkje lova sjølve; men dei vil at de skal omskjerast, så dei kan vera stolte av det som er gjort med kroppen dykkar.

¹⁴Men eg vil aldri i livet vera stolt av noko anna enn vår Herre Jesu Kristi kross. Ved den er verda krossfest for meg, og eg for verda.

¹⁵For det som tel, er ikkje å vera omskoren eller å vera uomskoren, men å vera ein ny skapning.

¹⁶[31] Alle som følgjer denne rettesnora — fred og miskunn vere med dei og med Guds Israel!

¹⁷[32] Heretter må ingen plaga meg meir, for eg ber Jesu merke på kroppen min.

¹⁸Vår Herre Jesu Kristi nåde vere med dykkar ånd, mine sysken! Amen.