Read nynorsk 2011 Efesarane 1 Bible Online

Efesarane 1 - nynorsk 2011 bible

Efesarane 1

¹[1] Paulus, etter Guds vilje Kristi Jesu apostel, helsar dei heilage {{i Efesos}}, dei truande i Kristus Jesus:

²Nåde vere med dykk og fred frå Gud, vår Far, og Herren Jesus Kristus!

³ [2] Velsigna er Gud, vår Herre Jesu Kristi Far, han som i Kristus velsigna oss med all Andens velsigning i himmelen.

⁴ I Kristus valde han oss ut før verda vart grunnlagd, til å stå for hans andlet, heilage og utan feil. I kjærleik

⁵ og etter sin eigen gode vilje avgjorde han på førehand at vi skulle få rett til å vera hans born ved Jesus Kristus,

⁶ [3] til lov og pris for hans herlegdom og nåde, som han så rikeleg gav oss i han som han elskar så høgt.

⁷ I han har vi fridomen, kjøpt med hans blod, tilgjeving for syndene. For så rik er Guds nåde,

⁸ som han lét strøyma over oss med all visdom og forstand,

⁹ då han gjorde kjent for oss sin viljes mysterium, det han gjerne ville gjera i han.

¹⁰ Han ville fullføra sin frelseplan då tida var fullmogen: å samla alt til eitt i Kristus, alt i himmelen og på jorda i han.

¹¹ I han fekk vi òg arverett, slik det frå først var tiltenkt oss etter forsettet til han som gjennomfører alt etter sin eigen plan og vilje,

¹²så vi som alt har sett vår von til Kristus, skal vera til lov og pris for hans herlegdom.

¹³ [4] I han høyrde de sanningsordet, evangeliet om frelsa dykkar. I han kom de òg til tru, merkte med seglet til Anden, Den Heilage, han som var lova,

¹⁴ [5] han som er pantet på arven til Guds eige folk blir sett fri, til lov og pris for hans herlegdom.

¹⁵15–16 [6] Difor held eg ikkje opp med å takka Gud for dykk når eg hugsar på dykk i bønene mine. For eg har høyrt om dykkar tru på Herren Jesus og om dykkar kjærleik til alle dei heilage.

¹⁷Eg bed om at vår Herre Jesu Kristi Gud, herlegdomens Far, må gje dykk visdoms og openberrings Ande, så de lærer Gud å kjenna.

¹⁸Må han lysa opp auga til dykkar hjarte, så de får innsikt i kva håp han har kalla dykk til, kor rik og herleg arven er for dei heilage

¹⁹og kor overveldande hans kraft er mellom oss som trur. For hans makt og styrke er veldig.

²⁰Med denne krafta reiste han Kristus opp frå dei døde og sette han ved Guds høgre hand i himmelen,

²¹over alle makter og herredøme, over alt velde og alle som styrer, og over kvart namn som nemnast kan, ikkje berre i denne tidsalderen, men òg i den komande.

²²Alt la han under hans føter, og han som er hovudet over alle ting, har han gjeve til kyrkja,

²³som er Kristi kropp, fylt av han som fyller alt i alle.