Read nynorsk 2011 Efesarane 2 Bible Online

Efesarane 2 - nynorsk 2011 bible

Efesarane 2

¹De var ein gong døde på grunn av misgjerningane og syndene dykkar.

²[7] De levde i dei slik ein gjer i denne verda og lét dykk leia av han som styrer i himmelrommet, den ånda som no verkar i dei ulydige.

³Ja, ein gong levde vi alle som dei. Vi følgde lystene i vårt eige kjøt og blod, vi gjorde det vårt kjøt og våre eigne tankar ville. Og vi var av naturen vreidens born liksom alle dei andre.

⁴Men Gud er rik på miskunn. Fordi han elska oss med så stor ein kjærleik,

⁵gjorde han oss levande saman med Kristus, vi som var døde på grunn av misgjerningane våre. Av nåde er de frelste.

⁶I Kristus Jesus har han både reist oss opp frå døden med han og sett oss i himmelen med han,

⁷så han i dei komande tider kunne visa kor overstrøymande rik han er på nåde, og kor god han er mot oss i Kristus Jesus.

⁸For av nåde er de frelste, ved tru. Det er ikkje dykkar eige verk, det er Guds gåve.

⁹Og det kviler ikkje på gjerningar, så ingen skal skryta av seg sjølv.

¹⁰For vi er hans verk, skapte i Kristus Jesus til gode gjerningar som Gud på førehand har lagt ferdige så vi skulle vandra i dei.

¹¹De var ein gong heidningar av fødsel og vart kalla uomskorne av dei som kallar seg omskorne, dei som er omskorne på kroppen av menneskehand.

¹²Kom i hug at de den gongen var utan Kristus, utestengde frå borgarrett i Israel, framande for paktene og lovnaden, ja, utan håp og utan Gud i verda.

¹³Men no, i Kristus Jesus, er de som før var langt borte, komne nær på grunn av Kristi blod.

¹⁴[8] For han er vår fred, han som gjorde dei to til eitt og reiv ned den muren som skilde, fiendskapen. Med sin eigen kropp

¹⁵sette han lova ut av kraft med hennar bod og forskrifter. Slik skulle han skapa dei to til eitt nytt menneske i seg — og skapa fred.

¹⁶I éin kropp skulle han forsona dei begge med Gud då han døydde på krossen og slik gjorde ende på fiendskapen.

¹⁷Og han kom og forkynte den gode bodskapen om fred for dykk som var langt borte, og fred for dei som var nær.

¹⁸Ved han har både de og vi tilgang til Far i éin Ande.

¹⁹[9] Så er de ikkje lenger framande og utlendingar. Nei, de er medborgarar saman med dei heilage og høyrer Guds familie til.

²⁰[10] De er oppbygde på grunnvollen til apostlane og profetane, og hjørnesteinen er Kristus Jesus sjølv.

²¹I han blir heile bygningen halden saman, så han veks til eit heilagt tempel i Herren,

²²og i han blir de òg bygde opp til ein bustad for Gud i Anden.