Read nynorsk 2011 Efesarane 3 Bible Online

Efesarane 3 - nynorsk 2011 bible

Efesarane 3

¹[11] Difor bøyer eg mine kne — eg, Paulus, Kristi Jesu fange for dykkar skuld, de som er heidningar.

²De har høyrt om den forvaltaroppgåva Gud i sin nåde har gjeve meg hos dykk.

³I ei openberring vart mysteriet gjort kjent for meg, slik eg kort har skrive om her.

⁴Og når de les det opp, kan de skjøna kor vel eg kjenner Kristi mysterium,

⁵det som menneska i tidlegare slektsledd ikkje fekk vita om, men som no ved Anden har vorte openberra for hans heilage apostlar og profetar:

⁶at heidningane har del i den same arven, den same kroppen og den same lovnaden i Kristus Jesus ved evangeliet.

⁷Eg vart ein tenar for dette evangeliet då Gud med si veldige kraft gav meg si nådegåve.

⁸Ja, til meg, den minste av alle dei heilage, er denne nåden gjeven: å forkynna for folkeslaga den glade bodskapen om Kristi ufattelege rikdom

⁹[12] og føra Guds frelseplan fram i lyset, det mysteriet som frå evig tid har vore løynt hos Gud, han som har skapt alt.

¹⁰Slik skulle hans mangfaldige visdom kunngjerast gjennom kyrkja for maktene og herredøma i himmelrommet,

¹¹slik Gud frå evig tid hadde fastsett og no har fullført i Kristus Jesus, vår Herre.

¹²I han har vi frimod, og i trua på han kan vi koma fram for Gud med tillit.

¹³Difor bed eg dykk: Mist ikkje motet om eg må lida for dykkar skuld; det er ei ære for dykk!

¹⁴ [13] Difor bøyer eg mine kne for Far,

¹⁵han som har gjeve namn til alt som heiter far i himmel og på jord.

¹⁶ Må han som er så rik på herlegdom, styrkja dykkar indre menneske med kraft ved sin Ande.

¹⁷ Må Kristus ta bustad i hjarta dykkar ved trua og de stå rotfeste og grunnfeste i kjærleik.

¹⁸ [14] Må de saman med alle dei heilage få styrke til å fatta breidd og lengd, høgd og djupn,

¹⁹ja, kjenna Kristi kjærleik, som er større enn nokon kan forstå. Må de bli oppfylte med heile Guds fylde!

²⁰ Han som verkar i oss med si kraft og kan gjera så uendeleg mykje meir enn alt det vi bed om og skjønar,

²¹ [15] han vere ære i forsamlinga og i Kristus Jesus gjennom alle slekter og i alle æver! Amen.