Read nynorsk 2011 Efesarane 5 Bible Online

Efesarane 5 - nynorsk 2011 bible

Efesarane 5

¹Ja, likna Gud, de som er hans kjære born.

²[19] Lev i kjærleik, liksom Kristus elska oss og gav seg sjølv for oss som ei gåve og eit offer, ein velluktande ange for Gud.

³Hor, alle slag ureinskap og eigesjuke må ikkje eingong nemnast mellom dykk; slikt sømer seg ikkje mellom dei heilage.

⁴Rå ord, tåpeleg tale og grovt snakk er òg uhøveleg. Sei heller Gud takk!

⁵For det skal de vita at ingen som driv hor, lever eit ureint liv eller er eigesjuk, har arverett til Kristi og Guds rike, for dette er avgudsdyrking.

⁶Lat ingen narra dykk med tomme ord, for det er slikt som gjer at Guds vreide kjem over dei ulydige.

⁷Gjer ikkje felles sak med slike!

⁸Ein gong var de sjølve mørker, men no — i Herren — er de lys. Så lev som born av lyset!

⁹For fruktene av lyset viser seg i alt som er godt, i rettferd og i sanning.

¹⁰Prøv då kva som er til glede for Herren!

¹¹Ta ikkje del i dei gjerningane som høyrer mørkret til, for dei ber inga frukt; avslør dei heller.

¹²Det som slike folk driv med i løynd, er det ei skam berre å nemna.

¹³Men alt kjem for dagen når lyset får avsløra det,

¹⁴og alt som kjem for dagen, er lys. Difor heiter det: Vakna, du som søv, stå opp frå dei døde, og Kristus skal lysa for deg.

¹⁵Pass difor nøye på korleis de lever, ikkje som ukloke, men som kloke menneske,

¹⁶så de nyttar den dyrebare tida godt, for dagane er vonde.

¹⁷Ver ikkje uforstandige, men forstå kva som er Herrens vilje.

¹⁸Drikk dykk ikkje fulle av vin, det fører til utskeiing, men bli fylte av Anden

¹⁹og syng saman, med salmar og hymner og åndelege songar. Syng og spel av hjartet for Herren!

²⁰Takk alltid vår Gud og Far for alle ting i namnet åt vår Herre Jesus Kristus.

²¹[20] Ver underordna kvarandre i ærefrykt for Kristus,

²²[21] de kvinner under dykkar ektemenn som under Herren sjølv.

²³For mannen er hovudet for kvinna liksom Kristus er hovudet for kyrkja; han er frelsar for kroppen sin.

²⁴Liksom kyrkja underordnar seg Kristus, skal ei kvinne underordna seg mannen sin i alle ting.

²⁵Menn, elsk konene dykkar, liksom Kristus elska kyrkja og gav seg sjølv for henne,

²⁶så han kunne gjera henne heilag og reinsa henne med badet i vatn, i kraft av eit ord.

²⁷På den måten ville han stilla henne fram for seg i herlegdom utan den minste flekk eller rynke. Heilag og lytefri skulle ho vera.

²⁸På same måten skal mennene elska konene sine som sin eigen kropp. Den som elskar kona si, elskar seg sjølv.

²⁹Ingen har nokon gong hata sin eigen kropp, nei, ein gjev kroppen næring og tek seg av han slik Kristus gjer med kyrkja.

³⁰[22] For vi er lemer på hans kropp.

³¹Difor skal mannen forlata far og mor og halda fast ved kvinna si, og dei to skal vera éin kropp.

³²Dette er eit stort mysterium; eg tenkjer på Kristus og kyrkja.

³³Men det gjeld dykk òg: Kvar og ein av dykk skal elska kona si som seg sjølv, og ho skal ha respekt for mannen sin.